Read Angami Naga Chieliko 50 Bible Online

Chieliko 50 - Angami Naga bible

Chieliko 50

¹Kekuo Ukepenuopfü, Jihovae niaki thu kepar nunu kele ketso, kijüu ki mha pu mu kieya.

²Zivi lotsocü Zion geinu, Ukepenuopfüe zieshü.

³Úko Kepenuopfü vorya, puo kemekrie baya mo, mi puoe puo mhodzü mhathe baya, puo khieümhouko rükrierükhrie tuoya.

⁴Puoe puo themiako nyie kecüketuo la tei pesoko kieshütuo, mu kijü rei satuo.

⁵“A kemesako pfhü kengupie a ki shüliecie; ruothoruori chü di a ze dietseidiekholieketako la!”

⁶Siro teiko puo kemiatho pesishüya; Ukepenuopfüe capiu ze ru. Selah

⁷“Rünyüliecie, harie a themiako, sitse a mha pushütuo; harie Israel, a n kepetsou die pushütuo; ae Kepenuopfü, n Kepenuopfü zo.

⁸N ruothoko la a n kerhie ba mo: morei n kethe ruosuoko rei la mo, sükosü a mhodzüki ba seiya zo.

⁹A n ki nu thudo puo rei lie morei vi, morei n mvü kro-u nunu mvüdo shierei,

¹⁰Kekreilamonyü ketsa nu nhachü kehoupuorei a vie zo, tsiu kiri kijüthou nyienyie gei ketuoko rei zo.

¹¹Ae kijüthou gei ketuo perako pete si ba; tsiu nhanu ketuo khunuo pete a vie.

¹²“A merüta shierei, a n ki pulie lho; kijüu mu sünu ketuo pete a vie ze ru.

¹³A thudoko chü cüya me? morei temvü zie krieya me?

¹⁴Ketshe ruosuo chüpie Ukepenuopfü tsüliecie;[32] mu kerükrietho-u ki n die phrakeshüko chüshüliecie.

¹⁵Kemezhiekelie ki a kieliecie; sitse a n kelashütuo, mu no a chü kemeyietuo.”

¹⁶Derei kerüzhümia kiwe Ukepenuopfüe pucü: “No a zhoko phrüketuo n mezhü kirapuo ba ga? Mu a dietseidiekhoko pie n tie nu shüse ki ta?

¹⁷Noe dieze mecüya, mu a dieko kelhoupie n sietsa shüwaya zo.

¹⁸No kerügumia puo ngu ro, puo ze kediekholieya, mu pieü kechüko ze puo chütaya.

¹⁹“No n tie kekha mo di pie kesuou tsüya, mu n meü se kelhiekecü rhüya.

²⁰No balie di n kepenuomia kepetsou die puya: sidi n thuo n zuo nuou ketha die puya.

²¹No hakoha chüwate, mu a kemekrie ba zo; no we a üse n mhie thenyüsie di leya. Derei a n kerhieya, mu theda pie n mhodzünu shüya.

²²“Tsie hauha leliecie, nie Ukepenuopfü rükra motayakezhako, mo üro a bu nie ciechücierhawa, di miapuorei nie kelakeshü jütatuo!

²³Ketshe ruosuo khashüyakezhamia a rhuya; tsiu cha puotouu[33] nu tuoyakezhamia, a Ukepenuopfü kelakelieu pie puo pekieshütuo.”