Read Angami Naga Chieliko 51 Bible Online

Chieliko 51 - Angami Naga bible

Chieliko 51

¹He-i Kepenuopfü, N ketseikevi ki ze a ngumezhieshücie, n kekhrie nouzhie kezha ki ze a kemouko vashücie.

²A kejokemouko khrü kemesa mpouwacie, mu a kephouma nunu a chü kemesashücie.

³A rei a kemouko sita zocü la; tsiu a kephoumako a mhodzüki ba seite.

⁴N petsou di, n rübei gei, a phoumawate, mu n mhodzü ki suoücüu sü chüwate; süla no we die pu sie rei mezhü zo, tsiu capi chükesie ki mesa zo.

⁵Harie, a we kephouma nunu a penuolie, mu kephouma nunu a zuoe a lhoupfülie.

⁶Noe thenou tsatie ketho-u menguya; süla kepekhre thenou mhasiu a tsücie.

⁷Hisop pie a chü kemesashücie, sitse a mesalietuo; a khrüwacie, siro a pekrie ki krakuotatuo.

⁸A chüpie a bu kenei mu thedzükezie rünyücie; noe bietshekewa ruko bu u neiliecie.

⁹A kephoumako kinu n zie kevielieyi; mu a kemouko va phrewacie.

¹⁰Thenou kemesa puo chüpie a nou shüshücie, harie a Kepenuopfü, tsiu thenou kemezhü mu puotoukecü ruopfü kesa puo a tsücie.

¹¹N mhingu kinu a kelhouwa hiecie; mu a kinu kemesa ruopfüu seta hiecie.

¹²N kelakelie keneiu pie a tsü lashücie; mu chüüze nyükecü ruopfüu pie a piesieshücie.

¹³Sitse a n chako pie kejokechüko pethashütuo, mu kephoumako thenou kedi n kitsa vorlietuo.

¹⁴Thezie kepekru nunu a kelaliecie, he-i Kepenuopfü, a kelakelie Kepenuopfü; tsiu a meüe n kemiatho pu keli petoshütuo.

¹⁵He-i Jihova, a tie khrüshücie, sitse a tie n ketshe pesishütuowe.

¹⁶Noe ruosuo n neiya mo, kemo we a süu khashü tieciü; no kethe ruosuo n neiya mo.

¹⁷Ukepenuopfü bu liekelie ruosuo[34] sü thenou tsopfhükecüu zo, rünou mo mu thenou suoketuo-u, Ukepenuopfü no süu meliewalie lho.

¹⁸N kenei nunu mha kevi chüpie Zion gei shülie; Jerusalem dahouko chü pesieshücie.

¹⁹Siro noe puotou tseikecü ruosuo, thepie ruosuo kechü n nou va pemvülietuo, sitse ukoe thudo pie n ruosuoba geinu ruosuo chüshütuo.