Read Angami Naga Chieliko 55 Bible Online

Chieliko 55 - Angami Naga bible

Chieliko 55

¹A kecha rünyüshücie, he-i Kepenuopfü; a mezhiekemelo ki n kevielieta hieyi.

²A pfhe rünyücie, di a pfhe khoshüyi, a panya a noukenyü chü bate.

³Kekreilamonyü ngumvümia pfhe la mu kerüzhümia pfheü la. Ukoe kemezhiekecü pie a gei shü, mu uko noupfhünouyie se a mecüya.

⁴A nou nu a meloue chüthor bate; tsiu kesia keprei rei a gei tsurte.

⁵Kemichie mu pekecü a gei vorte, mu kemerie chükecüe a mhapfü bate.

⁶Mu ae sie, “O, a bu rei mekhru tuoi a shü nyicü we; a pruota di rüleitatuo mu ru!” iba.

⁷Harie, sicü we a thu kepetse ra votatuo, sidi rayha nu batatuo. Selah

⁸A teikhrie khriedi kehe nunu rükri ta rüzhükelie chü nu votatuo.

⁹He-i Jihova, uko kebouwa mu uko diepuko kebvüwacie; ae rünau nu zhosuo mu kegeikecü ngukecü la.

¹⁰Teisoteizei uko süu dahouko nu whi baya zo; mha kebvükeboukecü mu kemezhiekecüe süu nu ba.

¹¹Kerüzhüe süu metsuo nu ba, mia kese mu thedo kesuoe puo chadiko nunu lataya mo.

¹²A pu pesuo kebako ngumvümia ücüwe, a süu hielietuo muü; morei a ngu mecükoe a rhu mo ücüwe, a süko kinu zowe rüshütatuo.

¹³Derei süko monyü, no a ze puokechüu, a khrietho-u, a dzieseu zo.

¹⁴A bu n ze a nei kevor-u, avu kepeza Kepenuopfü kinu voyakezhau thuote ru!

¹⁵Kesia bu uko gei mhai votacie, uko bu perhei Sheol nu tsucie; kerüzhüe uko kiko nu mu uko donu ba zocü la.

¹⁶Derei a Ukepenuopfü kieya; mu Jihovae a kelashütuo.

¹⁷Thevatie rei, tsiu khise mu khinhieluo rei, ae kechachü mu meloshü; mu puoe a pfhe rünyülietuo.

¹⁸Terhü chü a petsou keba nunu puoe a bu rüzapfü mo di a kelashü tuo; a perhieketuoko kra phita.

¹⁹Thiedzütho nu tuoketa Ukepenuopfü, Selah thuo rünyü di uko mese chüshütuo; ukoe rüdishüya mocü la, tsiu Ukepenuopfü preiya kemo la.

²⁰A zakrokoe puo dzie pie u khriethomia puo gei shüte, sidi a ze dietseidiekho varhuowa.

²¹Puo tie we thunudzü kha ki rei menekuo, derei puo melou nu we terhü; tier ki rei mejukuo, derei süko zhiecha zupiekeba kro puo zo.

²²N pie lhoupie[35] Jihova gei shüwalie, siro puo n se balietuo; puo mhakipuorei kemiathomia bu rünielie lho.

²³Derei, harie Kepenuopfü, no uko bu kepeka thekheu nu ketatuo; thezie kemenguko mu mia keseko u kelhouzha tietsa rei lhoulie lho. Derei a we n pele zotuo.