Read Angami Naga Chieliko 57 Bible Online

Chieliko 57 - Angami Naga bible

Chieliko 57

¹A ngumezhieshücie, he-i Kepenuopfü, a ngumezhieshücie; a ruopfüe n kinu rüzhülieyakezha la; uwe n shükhro nu a rüzhülietuo, kepekau rükrierükhriekecüu tuota kemochie.

²A Kepenuopfü kerükrietho-u ki melieshüya; a la mha pete chüshüyakezhau Ukepenuopfü ki.

³Puoe teigei nu ketseshü di a kelalietuo, a kede kebako bu thenga chütuo. Selah Ukepenuopfüe puo kelakejü kekhrie mu puo dietho ketseshütuo.

⁴A ruopfüe loshako donu zhü; süko u medasuo[36] di themia tecülieya; u huko rüngou mu theütsie zo; mu uko meüe zhiecha puoü kevi mhie.

⁵He-i Ukepenuopfü bu teiko mho rei kerükrieu chücie, n zayieu bu kijü pete mhocie.

⁶Ukoe kebie pethoupie a phichako nu zhüte; a ruopfüe rünuo tsuta. Ukoe thekhe puo thiepie a chanu zhü; uko thuo te süu nu lete. Selah

⁷A noue chüsechü ba zo, he-i Kepenuopfü, a meloue chüsechü ba! A keli mu ketshe tsali chütuo.

⁸Coliecie, a ruopfü! Colie, lyre mu harp! Teiso kesoushütuo.

⁹Themiako donunu a n tsheshütuo, he-i Jihova; seyieko donunu a ketshe tsali chüpie n ki shütuo.

¹⁰N kekhrie kela kejüu zhapie teiko tso, mu n dietho-u rei kimhouko tso.

¹¹Teiko mho rei kerükrieu chücie, he-i Kepenuopfü; n zayieu bu kijü pete mhocie.