Read Angami Naga Chieliko 62 Bible Online

Chieliko 62 - Angami Naga bible

Chieliko 62

¹A ruopfüe meü mo di Ukepenuopfü rübei khremerü baya; puo kinu a kelakelie voryawe.

²Puo rübei a tsiekrieu mu a kelakelieu zo; puo a dahou kerükrieu; a rünietalie lho.

³Nieko kichiepuo themia puo re zo batuo ga, nie zhalie mo ketou kede ba zotuo me? sozha morei cakha meta nyünuo keba puo kedekezha tuoi,

⁴Uko kele pete vo mia puo biekhrükeshü rhü keba rübei zo; ketijü rei uko neiya; uko u tie se japie mia tsüya, derei u nou nu mia rüseya. Selah

⁵A ruopfü, no we kemekrie di Ukepenuopfü rübei pfhe baya; a kemerü sü puo kinu zocü la.

⁶Puo rübei a tsiekrieu mu a kelakelieu zo; puoe a dahouu zo; a rünieta lho.

⁷A kelakelie mu a therhu sü Ukepenuopfü gei zo; a kekuo tsiekrieu, mu a keyau sü Ukepenuopfü zo.

⁸Harie themiako, puo pele sei zoliecie; nie nou ru pie puo mhodzünu shüshülie; Ukepenuopfü sü uko la rüzhükelie chü puowe. Selah

⁹Themia kerünuoko sü hakeshü puo zo, mu kerükrieko sü mhakhrü puo zo, roshükhouko nu uko rüka sietatuo; uko kesashü rei u thesü puo kirei medzakuo.

¹⁰Mia kemvü chükelie nu thepfu hie, mia vie sekecü nu kemethuo mhokuo chü hie; kinyiko kengukelie gei nie nou pie sünu shü hie.

¹¹Ukepenuopfüe va puo pushüte, a hau va kenie sicüu sü, kekuoe Ukepenuopfü vie zo ücüu.

¹²Rüdi kemo kekhrie rei n viewe, he-i Jihova. No themia kehoupuorei puo mhatho kheki sü chü, puo zhakhra khashüyacü la.