Read Angami Naga Chieliko 65 Bible Online

Chieliko 65 - Angami Naga bible

Chieliko 65

¹He-i Kepenuopfü, Zion nunu n ketshe pfhe chütuo; mu phrakeshü die chüpie n ki shütuo.

²Harie, mia kecha rünyüyakezhau, themia pete n ki vortuo.

³Puotou kemo chükewako; hie zepfükelie ki, no hie kekrükewako vashüya.

⁴No puo kedalie di puo bu n penuo vokeliemia kenei ngulieya, puo bu n kiluo nu lhoulieya. Hie n ki, n kemesa ruosuokiu, keviko geinu hie neilietuo.

⁵Noe kemiatho mhatho kemeriecüko se di hie kelashüya; harie hie kelakelie Kepenuopfü; noe kijü kela pete mu dzükezha kepecietho nu ketso kemerüu.

⁶N kekuo pie kijüthouko chü kemeteikelieu; kekuo pie n chie phapfü.

⁷Dzükezhako pfhe, mu dzürüpfhüko pfhe bie kemekriewayakezhau, tsiu themia bouübikecüko rei.

⁸Kepecietho nu lhouketuoko rei n zasiko ngukeshü ki u ngotaya; noe khise mu theva kepakele kharuko bu u nei di shiekhouilieya.

⁹Noe kijüu vasiya, mu dzü pie puo vashüya, no puo chü penyi phishüya. Ukepenuopfü rüu nu dzü tshu ba; Noe telha pie themia tsü, siketuo la noe mezashü eru.

¹⁰No dzü pie puo poko vashü; no khoupoko rei chüshü, no teirü pie süko va kemeneshü, no japie sünu lhou kesierko tsüshü.

¹¹No n kemephruokemevuo pie teicieu keditsüre chüshü; mu n chako mha kevi bu puo ketshu chü.

¹²Nhatsako nu ketshukelhuo; mu kijükhruko kenei pie u thuo u pha kemetei.

¹³Tekuo kroko bu phiechüko zepfütuo; razhako rei telha pie puo rütso chü; uko kenei pfü shiekhouiya.