Read Angami Naga Chieliko 66 Bible Online

Chieliko 66 - Angami Naga bible

Chieliko 66

¹Kenei pfhephra chüpie Ukepenuopfü tsülie, kijü pete;

²Puo za zayieu pie kelishülie; puo ketshe chüpie zapuzayie chüshülie.

³Ukepenuopfü ki haikecü pulie, “N mhathoko kemerie zalie! N kekuo kezha nunu n ngumvüko u thuo u khapie n khro shüwatuo.

⁴Kijüu pete n rüsuoya, mu kelipie n ki shüya; uko tsali chüpie n za tsheya.” Selah

⁵Vor di Ukepenuopfü mhathoko mehocie; puo mhathoko ha chüüphou mhodzünu kemerie!

⁶Puo dzükezha chüpie kijü keso chüshü; uko phi se kerüko pfüthe vo. Sünu puo la hie neilie.

⁷Puo kekuou nunu puoe kechachie diya; puo mhi-e seyieko meho baya; mia perhiepetsoukezhako bu u thuo u chü pezhata hie. Selah

⁸Harie themiako Kepenuopfü tsheliecie, puo ketshe pfhe mia bu sicie.

⁹U kerheiro pekru se kerheiko donu bayakezhau, puo u phi bu cierhieta mo.

¹⁰Harie Kepenuopfü, no hie dojüwate, rakachü chü kemesakecü tuoi hie dojüshüte.

¹¹No hie ze vor kebie nu shü, no thepie pie hie chie gei shüshü.

¹²No mia bu hie tsüko gei tuo; hie mi mu dzü rei pfüthe vo, derei no hie ze vor thechü kemeya puo nu shüshü.

¹³A kethe ruosuoko se n kiu nu vortuo; a die phrashütuo;

¹⁴A kemezhiekelie ki a tie-e phrakeshüko, a me-e pukecüko.

¹⁵A khunuo keluoko pie kethe ruosuo chü n tsütuo, mu mvüdo kethe ruosuo mikhu se; thudo mu temvü se rüsuo chüshütuo. Selah

¹⁶Vor di rünyüliecie, Kepenuopfü preiyakezha khe, sitse ae puo a la kedipuo chüshü shicüko pushütuo.

¹⁷A a tie nunu shiepie puo ki shü; mu a meü se puo pu pezhashü.

¹⁸A nou nu a mha kesuo leya liro, Jihova a pfhe rünyü mota zotuo.

¹⁹Derei Ukepenuopfüe rünyülieta tou zo; puo a kecha pfheko rünyülie.

²⁰Ukepenuopfü bu thetshe kepfüu chücie, puo a kecha meliewata mo, morei a kinu puo kekhrie seta mocü la.