Read Angami Naga Chieliko 68 Bible Online

Chieliko 68 - Angami Naga bible

Chieliko 68

¹Ukepenuopfü bu sielie, puo ngumvüko bu cüretalie; puo ngumecüyakezhako bu rei puo mhodzünu nu tatalie.

²Mikhu hepfü tatayakezha tuoi uko whuo petawalie; mepfhibuo mi mhodzünu zhatayakezha tuoi kerüzhümia bu Ukepenuopfü mhodzünu katacie.

³Derei kemiathomia bu u noumvülie, uko bu Kepenuopfü mhodzünu u neilie; U zo, uko bu u nei philiecie.

⁴Kelipie Ukepenuopfü ki shülie, puo za ketshe tsali chücie; chieli pie kimhou geinu vorkezhüu ki shülie;[40] puo zae Jihova, puo mhodzünu u neilie.

⁵U puonuo kejüko puou, samipfüko keyau, süu Ukepenuopfü kemesa chü nu bayakezhau zo.

⁶Ukepenuopfüe kemenga ketuomia bu u kikruko nu lhoulieya, puo kediemiako ze par kruokelie nu shüya; derei mia perhiepetsoukezhamia we kijü sotocü nu lhouya.

⁷He-i Kepenuopfü, no n themiako mhodzünu kevo ki, no rayha pfüthe kevo ki, Selah

⁸kijüu rünietaya, teiko rei Ukepenuopfü tuokecü la rü tsurya; Ukepenuopfü, Israel Kepenuopfü, Ukepenuopfü, Sinai Kepenuopfü la.

⁹Harie Kepenuopfü, no tei perü pie tshushü, no n kayieu mezieketa ki puo chü kemeteishü.

¹⁰N themiako sünu lhou ketuo ngulie, he-i Kepenuopfü, noe kejüko vaphishü.

¹¹Jihovae die khashüya; dielie zakeshü kro-u zha zalie;

¹²“Rüpfhünuo mho kedikoe tataya; uko tataya; mu kibapfüko bu mha vakelieko kezalie.

¹³Uko tekuo kroko donu tuo zorei, mekhru puo shü rakachü pie chüpfü; mu puo shütie suna kemeva pie whekepfü tuoi zo.”

¹⁴Kuokejokejüu sünu kediko whuokecürekewa ki, Zalmon nu pekrie krüta zo.

¹⁵Harie, kijüthou kezhau, Bashan kijüthouu; harie, kijüthou kekra keba Bashan kijüthou!

¹⁶No kiüdi mha ngu n mhikeluya ga? Harie puothou krakecü kijüthou, Ukepenuopfüe ba nyüyakezha kijüthou-u, Jihovae kechachie sünu lhou ketuo kijüthou-u.

¹⁷Ukepenuopfüe guragari kevitho, nyie kercü va kenie; nyienyiekecü se di; Jihovae Sinai geinu puo kemesa chü nu tsur.[41]

¹⁸No kijü kerükrie gei sie, kedie teze; mu themiakoe mhapie n ketsüko pielie; n perhiepetsoukecümia kinu zorei; Jihova Ukepenuopfü bu sünu bakecü la.

¹⁹Teisonhie u pie pfüyakezha, Jihova tsheliecie, Ukepenuopfü u kelakelieu. Selah

²⁰Úko Kepenuopfüe kelakelie Kepenuopfü zo; kesia nunu tapra kelie-e Jihova u Kepenuopfü vie.

²¹Derei Ukepenuopfüe puo ngumvüko tsü vütshiewatuo, puo tsütha the nounoupfü di puo kephoumako nu tuocüu rei.

²²Jihovae pushü, “A Bashan nunu uko ze la vortuo, a dzükezha kesouko nunu uko ze la vorshütuo;

²³N bu n phi pie thezie rheketuo la, sidi n füko meü bu rei ngumvümia kinu u ya ngulieketuo la.”

²⁴Harie Kepenuopfü, no mesümede di tuo kevo ngu, a kediu, sidi kemesa chünu kelie.

²⁵Tsali kechüko rie, tsali kesiko nuo, rüümia tambourin khou di metsuo nu tuo:

²⁶“Mechü krodi nunu Ukepenuopfü tsheliecie; Jihova, he-i no Israel dzüluo-u!”

²⁷Benjamin seyie kecütho bu rie, Juda kedi nuonuoko, Zebulun kedi nuonuoko, mu Naftali kedi nuonuoko puo kro chü.

²⁸He-i Kepenuopfü, n kekuo kieshücie, n kekuo pesishücie, he-i Kepenuopfü, no hamhodzü hie la chükeshü tuoi.

²⁹Jerusalem nu rüsuokiu la kediko mha se vor n tsü.

³⁰Tekhrieko donu ketuo nhachüko ruoshücie; thudo kro-u nu thuü nuonuoko keba seyieko sa. Shükeiraka kemehouko kedewacie; terhü u neiyakezhako whuo kecürewacie.

³¹Ijipt nunu merenyi se vorcie; Ethiopia[42] bu puo dzie yha mhapie Ukepenuopfü tsücie.

³²Kelipie Ukepenuopfü ki shüliecie, harie kijüu rüvieko, ketshe tsaliko chüpie Jihova ki shülie. Selah

³³Nnhie nnhienu tuoketa teiko gei bayakezhau ki shülie; harie, rünyüshücie, puoe puo pfhe phrashüya, mu süu puo ratsa kere puo.

³⁴Kekuo pie Ukepenuopfü tsülie; puo kevi Israel mho baya, tsiu puo kekuoe teiko gei baya.

³⁵Ukepenuopfüe kemerie, puo[43] kemesa chü nu Israel Kepenuopfüu, kekuo mu kemeguo pie puo themiako tsüya. Ukepenuopfü bu thetshe kepfüu chücie!