Read Angami Naga Chieliko 69 Bible Online

Chieliko 69 - Angami Naga bible

Chieliko 69

¹A kelashücie, harie Kepenuopfü; dzüko a vo nu khorketa la.

²A rüle nyoba kesou nu lete, phikhra kejü puo nu; dzü kesou nu lete, sünu dzürüpfhü a mho vorte.

³A kra a nyiete; a mezha sote. A a Kepenuopfü pfhe ba a mhi thachüte.

⁴Puoca kejü nu a ngumecüyakezhakoe a tsüthako kirei krakuo; puotou kemo nunu a ngumvü di a pekawatuoü kebakoe kra se. A rügu kemoko rei, a bu sutuo me?

⁵He-i Kepenuopfü, no a rhanyako si; a kejokechüko noe si, n kinu keviewa mo.

⁶Harie Kepenuopfü, krodiko Jihova, n khremerütuoyakezhako bu a la mengata hiecie. N pfhüyakezhako bu a la u ziekejü chüta hiecie, harie Israel Kepenuopfü.

⁷A n la mia krenyü chü; sidi thenga a zie zepfülie.

⁸A siezedzürieko donu rüsomia puo chüte: a zuo nuonuoko donu solhimia puo chüte.

⁹N kiu la a rhiekechüu thuo a cüliete; n kengakecüko a gei pfüte.

¹⁰A mevo di a kelhou chü kerünuo shü, sitse süu la a pesete.

¹¹Gakhropfhe pie a pfhenei chüpfüshü ru; a pie mia diebo chüte.

¹²Kharu nu kebako a dze kepupie die chü bate; kemezeko a pie tsali chüte.

¹³Derei a zo we, a kecha sü n ki rübei zo, harie Jihova, lielie kevi teiu nu; harie Kepenuopfü, n kekhrie kelakejü nunu a pfhekhoshücie. n kelakelie ketho-u nunu,

¹⁴nyoba nunu a kelashü di a bu rületa hieyi; a ngumvüko kinu mu dzü kesou nunu a kelaliecie.

¹⁵Dzüdiu bu a vupfülieta hiecie, kesouko bu a mezulieta hiecie, mu thekreu bu rei a mho puotie kemalieta hiecie.

¹⁶A die kelashüyi, he-i Jihova, n kekhrie kelakejüe vicü la; n kekhrie kezhau ki ze rürei a kitsa vashücie.

¹⁷N kituou kinu n zie kevielieta hiecie; a kemezhie zhüte; kedzükri di a die kelashücie.

¹⁸Penuo vor di a rhaliecie; a ngumvüko la a phreishücie.

¹⁹Mia a pesekecü, a kengakecü mu rhu kemo noe siya; a ngumvüko pete noe si ba zo.

²⁰A kengakecüko bu a melou biephrowate; a dzüzei phite. Ae ngukemezhie pfhü, derei puorei tuo mo; thenou thukepeluo pfhü, derei puorei ngulie mo.

²¹Uko therei pie a bu cü; mu a terhülie ru kekhrodzü pie a bu krie.

²²Uko mizhü bu uko la ciephrie puo chütacie; mu uko yakepieko la kebie puo chütacie.

²³Uko mhi bu zeitacie, sitse uko mhangulie kenjütatuo; mu uko chie bu pe sei tuotalie.

²⁴N neikemo rupie uko gei shücie; mu n nouyie kereu bu vo uko tsocie.

²⁵Uko kelhouchü bu ruotalie; miapuorei bu uko pfhekiko nu lhou hie.

²⁶Ukoe no puo vükeshümia pechüketa la; mu no biekerüzakeshüko pechü sashütaya.

²⁷Kepejo sie rei pejoshücie; mu uko bu n kinu mejülie hiecie.

²⁸Kerheimia leshüdau nunu uko vawalie, mu kemiathoko kronu uko za sa pie rei hie.

²⁹Derei a we rünuo mu thenou suo bate; harie Kepenuopfü, n kelakelie bu a rüguoliecie.

³⁰A tsali puo se Ukepenuopfü za tshetuo; mu kethezie se puo chü pezhatuo.

³¹Haue thudo puo ki rei Jihova nei chü kuolietuo, thudo puokia mu puomou kepfü kirei.

³²Mia u pesekecümia bu süu ngu di u neiliecie; nie Ukepenuopfü pfhüyakezhako, nie melou bu puo neiliecie.

³³Jihovae ketsopfhümia pfhe rünyüyakezha la, mu puo themia mia die chüketuoko rütsetaya mo.

³⁴Tei mu kijü bu puo tsheliecie, dzükezhako mu sünu meleketuo khe bu.

³⁵Ukepenuopfüe Zion kelashütuo, mu Juda rünako chü lashütuo; sidi puo kituoko bu sünu lhoutuo[44], mu süu welietuo.

³⁶Puo kituoko nuonuoko süu welietuo; mu puo za u neiyakezhako sünu lhoutuo.