Read Angami Naga Chieliko 73 Bible Online

Chieliko 73 - Angami Naga bible

Chieliko 73

¹Ukepenuopfü sü kediethoko[48] gei vi, u nou kemesako gei rei.

²Derei a we a phi mesüta nyünuo; a phichako tsierhielie nyünuo.

³Ae kerüzhakecüko, tsiu kelhiekecüko kruokelie ki a rota.

⁴Uko kechükenyü puorei seüdzülie mo, uko phou shürho mu mecamekhro zo.

⁵Kekreimia tuoi di ukoe kemezhiekecü dzüya mo; mia tuoi di thesa nguya mo.

⁶Süla ukoe kemiakokecü pie uko cü chü kelieya; mia kemvü kechü pie u pfhenei tuoi uko whepfü tuoya.

⁷Luo pie uko mhi rüla tuoya, kenya se uko melou tshu tuoya.

⁸Ukoe mha krekenyü mu mia ngu nyü kemo die puya; ukoe kerüzha di mia kede, mia neketetaya.

⁹Uko tie pie teigei kepetsou die puya, mu uko meüko bu kijüu gei houtuoya.

¹⁰Süla themiako sie uko tsheya; mu uko gei kekrü ücü ngulie motaya.

¹¹Sidi ukoe sie, “Ukepenuopfüe kikidi silie ta? Kerükrietho-u gei mhasimhale nyiü me?” siya.

¹²Harie, kerüzhümia haiya; rüütshüi di, uko kinyi kra kechülieya.

¹³A we a nou chü kemesa pie keba thedo chü; mu kejo kejü nunu a dzie meteikewa rei thedo.

¹⁴Zhate thesa a va, teisoduü a pechü.

¹⁵Ae sie, “A haicü putuo” üro, n nuonuoko phou nu dietho kemo chüwata rei si mo.

¹⁶Derei a kimhiei di hau silietie shi idi lekesie ki, süu a nyiekecü mhatho puoketa ngulie;

¹⁷a Ukepenuopfü kemesa chüu nu vo kemochie; süze a uko thelau silie.

¹⁸No uko khapie kerünyüko gei shüwata tou zo; no uko bu te keka nu tsute.

¹⁹Uko bu kiki zo di zopuo nu ka zolie shi, kemichieko bu uko tsho tseiwate!

²⁰Ukoe u mho kepema puo tuoi zo, co sierkelie ki noe uko khrüko rütseya.

²¹A ruopfü rünou mota, mu a melou chüteiketa ki;

²²a nyieto khrü mu mhasi mota, a n mhodzünu khunuo puo mhieta.

²³Sishierei a n ze sei tuo zo; no a dzie a zatsa thezese tuo.

²⁴No n mhasiu pie a chathashüya, sidi kenuotsa therhu nunu a zelie.

²⁵A la teigei sü n sie supuo nyi ga? Tsiu kijü nu rei no kemosie a kemengu kekrei tuo mo.

²⁶A chü mu a melou thachütalie vi; derei Ukepenuopfü a melou kekuou[49] mu kechachie a yau zo.

²⁷N kinu pecie tuoketako katatuo; noe n gei dietho kemoko pekawaya.

²⁸Derei a la we Ukepenuopfü penuokelie we vi; ae kerükrietho Jihova pie a keyau chüliete, a bu n mhatho peteko pu phreshülieketuo la.