Read Angami Naga Chieliko 74 Bible Online

Chieliko 74 - Angami Naga bible

Chieliko 74

¹He-i Kepenuopfü, no kiüdi kechachie hie khawata mu? Kiüdi n rituo chü nu ketuo kuoko gei n nou kemeyie bu khu sieta ga?

²No thiedzütho khrülieketa themiako rükrashücie, n kayie chütuoü di n thuo rhalieketau; Mu no n kelhouchü Zion kijüthouu rükracie.

³N phichako pie kechachie ruoketa kitsashücie, ngumvümia bu kemesa chüu nu keba pete pekaperuowate.

⁴N ngumvümiakoe n kemesa chüu donu ruorüi bate; sünu zasi la uko thuo uko zasiu pesielie.

⁵Ukoe seidurü se kicie mhotsa sei sozhau durhuowate.

⁶Sidi uko seidurü mu seivüko pie sei kepie puokhu kethuko rei dutshedutshawa.

⁷Ukoe mi pie n kemesa chüu thewate; uko n za kebachüu bie perhupie kijü shüwate.

⁸Uko u thuo u rüchü di: “We uko peka lotsowatuo” siya. Ukoe kijüu nu Ukepenuopfü rüsuoyakezha ki pete thewa.

⁹We u zasiko ngu mote; siedzekesi puorei tuo mote, kichiepuo hi batie shikecü kesi puorei u donu tuo mote.

¹⁰Harie Kepenuopfü, ngumvümia bu kichiepuo n pie kerüdza batieya ga? Ngumvümia bu kechachie n za tha ba zotuo me?

¹¹Kiüdi n dzie kekhalieta ga? Kiüdi n dziepie n merü gei ba zo ga?

¹²Siürei Ukepenuopfü a kediu sü thiedzütho nu ketuou zo. No kelakelie se kijü tsur.

¹³No n kekuo üse dzükezhako kezawaya: no dzü nu ketuo dragonko tsü vütshiewaya.

¹⁴No dzü nu ketuo Liviathan tsüko bietshie phaphawate: No puo khapie rayha nu khunuoko ca chüwate.

¹⁵No dzüluo mu rücüko duphashü; no kru seikezhü dzüluoko pesowa.

¹⁶Teiso n vie, teizei rei n vie zo; noe khrü mu niaki chüshü.

¹⁷No kijüu vala pete chüshü; noe teisei mu teile chüshü.

¹⁸Ngumvüu n krekecüu rükrashücie, harie Jihova; mu mesa kemomia n za thakecü rei.

¹⁹N paruonuo phouu pie nhachüko tsüwa hie; kechachie n themia ketsopfhüko rükra mota hiecie.

²⁰N dietseidiekho-u rhushücie; kijüu nu thechü kezei peteko nu mia kemvü kechüko tshupfü tuoketa la.

²¹Mia u kepeseko bu thenga chüta hieyi; kejü nu ketsopfhüko bu n za tshecie.

²²Harie Kepenuopfü, sielie di n zha puliecie; mesakemo-ue zhate n krekezha rükrashücie.

²³N ngumvüko meyhu ketha rükra mota hie; n kepetsouko bouübi keba pfhe rei.