Read Angami Naga Chieliko 77 Bible Online

Chieliko 77 - Angami Naga bible

Chieliko 77

¹Ukepenuopfü ki melieshü; puo bu a pfhe silieketuo la Ukepenuopfü ki melie petoshü.

²A kemezhiekelie ki Niepuu pfhüya; theva gei mezieta mo di a dzie cha se ba zo, a ruopfü puo nou luolie mvüta.

³A Ukepenuopfü rükralie meheimelo; tsiu mhale a ruopfü phisiata. Selah

⁴No a mhi bu mhimieta mo balie; a kemezhiethor di diepulie kenjüte.

⁵A thiedzü zhako leshü, thiedzü voketa teicieko leshü.

⁶Theva gei a melou ze kerüchü; a mhale mu a ruopfü pfhü zo:

⁷“Niepuu kechachie a melietuo me? puo a gei vi lashü lhote me?

⁸Puo kekhrie kelakejüu kechachie la thela chüte me? puotei pete la puo phrakeshüko rei jüta zo me?

⁹Ukepenuopfüe ngukemezhieu rükra mote me? Puo nouyie pie puo noushünouzhie khaliete me?” Selah

¹⁰Mu a sie, “Hau a nousuo puote; Kerükrietho-u dzie puo zatsa rüdite ru.”

¹¹A Jihova mhathoko rükratuo; no thiedzü ungomhatho chükeshüko a rükratuo.

¹²A n mhatho peteko lemedotuo, mu n mhatho kezhako leshütuo.

¹³Harie Kepenuopfü, n chae mesa. Terhuo kicüpuoe u Kepenuopfü mhiei zhacü ba ga?

¹⁴Noe u ngo chüyakezha Ukepenuopfü zo; noe themiako donu n kekuo pie pesishüwate.

¹⁵No n bou kekuou pie n themiako rhaliete, Jakob mu Josef nuonuoko. Selah

¹⁶Harie Kepenuopfü, dzüko n ngukeshü ki, dzüko n ngucü ki uko michieta, kesouko rüsü khrokhrota.

¹⁷Kimhouko dzü rushü, teiko se krakrashü, n theütsieko lutsahatsa vote.

¹⁸N teikese-e khriewhi nu tuo; n teikemelako kijüu va pezieshü; kijüu pe mu rünieta.

¹⁹N chau dzükezha pfüthe; n chatse dzü kekuoko pfüthe; sirei n phisie we nguchie mo.

²⁰Mosa mu Aron unie dzie se di noe tekuo kro puo tuoi n themiako ta ze tuo.