Read Angami Naga Chieliko 78 Bible Online

Chieliko 78 - Angami Naga bible

Chieliko 78

¹Harie a themiako, kepetha die gei nie nyie kedeishücie; nie nyie kedeipie a tie nu dieko rünyüliecie!

²A a tie tiehie sie dievi nunu putuo; kerieki tuoketa die kesouko putuo.

³We rünyülie mu silieketako, u krü u ki pukeshüko.

⁴Uko nuonuoko kinu we süko keviewalie lho; vorkezhü phouu ki pushütuo. Jihova zayie mhathoko, mu puo kekuo mu ungomhatho chükeshüko putuo.

⁵Puoe Jakob gei chünukeshü puo chüshü; mu Israel nu thezho puo chüshü; süu puoe u puonuoko bu pie u nuonuoko pethashünu die khashü;

⁶sidi vorkezhü phou-ue süko silietuo, penuo vor moluocü nuonuoko bu rei, mu uko rei uko nuonuoko ki putuo.

⁷Silie ro uko rei uko kemerüu pie Kepenuopfü gei balietuo, mu Ukepenuopfü mhathoko rükra motalie kelho la, sidi puo die khakeshüko zelietuocü la.

⁸Mu uko bu u krünuoko mhietalie kelho la; süko we pietsümvü mu mia die ze kemvü phou puo, u nou chüsechü se tuolieya kemo phou puo zo; uko ruopfü Ukepenuopfü gei dietho balie mo.

⁹Efraimko theü pie u rünyie chü, derei terhü nhie pesieta.

¹⁰Uko Kepenuopfü ze dietseidiekhokelieu se thalie mota, uko puo khakeshü zho-u ze mvüta.

¹¹Ukoe puo mhathoko mu puo ungomhatho chüpie uko pekiekeshüko rükra mota.

¹²Uko puonuoko mhingu ki nu u ngo zocüko chükeshüko; Ijipt kijü nunu, tsiu Zoan lieko nunu.

¹³Puo dzükezhau khoshü, sidi uko bu süu cie pfhülie; mu puoe dzüko deipie tsiepfhe mhie zowa.

¹⁴Puoe khinhie gei kimhou bu uko chatha, mu teizei gei mi kezie puo bu uko chatha.

¹⁵Puo rayha nu tsiekrieko biekhoshü, sidi kesou nunu kepar tuoi kekrie dzü khashü.

¹⁶Puo tsiekrie geinu rücü dzü bu kru par, sidi kerü tuoi dzü bu kru tsu.

¹⁷Sizorei uko puo gei phoumakuo zota, kijükesia nunu Kerükrietho-u perhiepetsouta.

¹⁸Uko neikecü ca cha di Ukepenuopfü dojüta.

¹⁹Uko Ukepenuopfü petsou di sie, “Kepenuopfüe rayha nunu mizhü puo keseshülie vi me?

²⁰Puoe tsiekrie vüshü, dzü kru par, rücüko tshu zieta zorei; puo niekhrüda rei khashülie vi me? morei puo themiako la themuo khashülie vi me?” sita.

²¹Süla Jihova süu sikeshü ki puo nou meyie seta; sidi Jakob kepetsou mi puo petushüta, mu Israel gei rei thenou meyie sieta.

²²Kekreilamonyü uko Ukepenuopfü pele kemo la, mu puo kelakelie kekuou pele moketa la.

²³Siürei puoe teiko ki die khashü, mu teigei kikhako khrüshü.

²⁴Sidi uko bu cüketuo la puoe manna perüpie uko tsü, sidi teigei lha pie uko tsü.

²⁵Themia bu teigeidieliemia niekhrüda cü; puo kecüca ketsepie uko kelhuo chüshü.

²⁶Puo niathutsa teikhrieu chüpie teiko he se vorshü, mu puo kekuo geinu pekhrotsa teikhrieu cha thashü.

²⁷Puo themuo perüpie nyophe mhie zoshü, mu puo shükepfü perako chüpie dzükezha nu theshünyo mhieshü.

²⁸Puo süko petepie uko pfheki kitiezha nu shüshü, uko khieümhou peteko nu.

²⁹Uko cülie mu pevülie, puoe uko menguko khashü uko tsü.

³⁰Derei uko u menguko tseilie kemonu, uko ca uko me nu baluocü nu,

³¹Ukepenuopfü nouyie uko gei sieta, uko donu kekuothoko biekhriwa, mu Israel nyie puo kenhepie zhüwa.

³²Sizo rei uko kephouma chü ba zo; puo mhatho u ngoko pelelie mo.

³³Süla puo uko teisozhako chü pedzüpie hashü kevi puo mhiewa; mu uko teicieko pie kemeriecü nu shüwa.

³⁴Puo uko biekhrikeshü ki uko puo pfhüta; uko thenou kedilie mu thetho chü Ukepenuopfü pfhüta.

³⁵Uko Kepenuopfüe uko tsiekrieu Kerükrietho Kepenuopfü uko kelakelieu ücü rükralie.

³⁶Derei uko tieko pie puo kese die pu, mu uko meüko pie puo gei ketijü puta.

³⁷Uko nou we puo kitsa chüsechü tuo mo, uko puo dietseidiekho-u nu dietholie mo.

³⁸Sirei puoe ngukemezhie tshupfü di uko kejo vashü mu uko pekawa mo; puoe tsiemelie puo nouyieu kethelielie di, puo nouyie pete bu sier mo.

³⁹Puoe uko chüüphou zoücü rükra; teikhrie puo ta la vorya kemo mhie.

⁴⁰Ukoe rayha nunu kidepuo puo gei panyasie shi, mu kijükesia nunu puonou chü kemezhieshü shi!

⁴¹Ukoe Ukepenuopfü kedo lala zo, mu Israel kemesau the pesuo isi.

⁴²Ukoe puo kekuo le mote, morei puoe ngumvüu dzie nunu uko rhakelie teiso-u rei rükra mo.

⁴³Puoe Ijipt nunu zasi chükeshüko, mu Zoan lieko nunu ungomhatho chükeshüko rei.

⁴⁴Puoe kerüko pie thezie chüwa; sidi ukoe rücüko nunu dzü krielie suota.

⁴⁵Puoe teizie krodi ketsepie uko donu shü di süko bu uko cülie; mu guorünuo, süko bu uko pekawa.

⁴⁶Puoe uko lieko pie zope tsüwa, mu uko mhatho siko pie kuprie tsüwa.

⁴⁷Puo prü bu uko khube boko pekawa, mu thege pie uko krabvü boko vawa.

⁴⁸Puo uko kiriko khapie prü tsüwa, uko thukro pie methie tsüwa.

⁴⁹Puo nouyie kerepie uko geishü, nouyie, puo nei kemo, tsiu nousuo rei, mha kepeka dieliemia kro puo rei.

⁵⁰Puoe puo nou kemeyieu la cha puo chülie; puo kesia nunu uko kelashü mota, derei uko khapie thepe nu shüwa.

⁵¹Puo Ijipt nu nuorie pete dukhriwa, Ham pfhekiko nunu uko kekuo noupra kerieu.

⁵²Sidi puoe puo themiako tekuo tuoi ze pralie, mu rayha nu tekuo kro puo tuoi uko chathalie.

⁵³Puo uko pekru ze tuo, süla uko michieta mo; derei uko ngumvüko we dzükezha bu vupfülieta.

⁵⁴Mu puoe uko ze vor puo kemesa kijükhru gei shü; puo dzie puo zatsapie penyükelie kijüthou-u nu.

⁵⁵Puoe uko mhodzünu nu seyieko whuowa; sidi kijüko keza pie uko tsü di uko bu pevielie, mu Israel seyieko bu uko pfhekiko nu lhou.

⁵⁶Sirei ukoe Kerükrietho Ukepenuopfü medophi mu puo petsouta, puo khakeshü dieko se balie mota;

⁵⁷Sizomonyü rüreita mu uko puonuoko tuoi dietho mota, theü kerüwi tuoi rüpfhita.

⁵⁸Ukoe uko tha kerükrieko se di puo nou chü kemeyiewa, mu uko terhuo miarhiko la puo nou chüpie puo ro sieta.

⁵⁹Kepenuopfü hau sikelie ki puo nou meyie seta, mu puo Israel melie kegewata.

⁶⁰Puo Shilo rüsuokiu khawa, puoe pfheki chüpie themiako donu keshüu.

⁶¹Sidi puo kekuou khapie kedie nu shüwa, puo zayieu pie ngumvümia dzie nu shüwa.

⁶²Puoe puo themiako khapie zhiecha nu shüwa, mu puo kayieko gei puo nei mo seta.

⁶³Mi bu uko khriesako the pejüwa; mu uko rüüko thenyhü tsali chücü jüta.

⁶⁴Uko zievoko zhiecha geinu tetsuta, mu uko samipfüko thekrü puorei chü mo.

⁶⁵Sitse Jihovae zezhü di cokelie tuoi sierlie, kekuomia puoe zu la shie ketha tuoi.

⁶⁶Sidi puo ngumvüko penyü tsei lawa; puo uko khapie kechachie thenga nu shüwa.

⁶⁷Sizomonyü puo Josef pfhekiu meliewa, mu Efraim seyieu kedalie mota.

⁶⁸Derei puo Juda seyieu kedalie, puoe khrieyakezha Zion kijüthouu.

⁶⁹Puoe tei kerükrieko tuoi puo rüsuokiu chülie, puoe kechachie la pesiekeshü kijüu tuoi.

⁷⁰Puo kituou David kedalie, sidi tekuo kro nunu puo chü separlie.

⁷¹Tekuo krüpfüko nuonuo kepfhe nunu puo ze parlie, Jakob mu puo themiako kepfheu chüketuo la puo ze parlie.

⁷²Puo nou kemezhü se uko pfhe, mu chü kesi dzieu pie uko chathashü.