Read Angami Naga Chieliko 80 Bible Online

Chieliko 80 - Angami Naga bible

Chieliko 80

¹Rünyüshücie, harie Israel kepfheu, tekuo kro puo tuoi Josef chatha ze tuoyakezhau! No Cherub nie donu di keba, zie parliecie.

²Efraim mu Benjamin mu Manasseh mhodzünu, n kekuou piesieshülie, sidi vor hie kelaliecie.

³Hie chü pevi lashücie, he-i Kepenuopfü; n zie zieshücie, hie kelalieketuo la.

⁴He-i Jihova, krodiko Kepenuopfü, no kichiepuo n themiako kecha gei n nei mo ba zotuo ga?

⁵Noe mhidzü niekhrüda pie uko vachü, mu mhidzü pie uko hie ketshu chüpie uko bu krie.

⁶No hie chüpie zanuomia bu hie meleketuo[51] chüshü, mu hie ngumvüko thuo hie kreya.

⁷Hie chü pevi lashücie, he-i krodiko Kepenuopfü; n zie bu hie gei zieshücie, hie kelalieketuo la.

⁸No Ijipt nunu khube puo se vorshü; no seyieko whuowa di süu leishü.

⁹No süu la kijüu mesashü; mu süu puomie kre pesoulie di kijüu tshuta.

¹⁰Süu khrü thuo kijüthouko soulie, mu puo coko thuo sedar bo kekuoko soupfülie.

¹¹Puo coko the vo dzükezha tso, mu puonuotheko kerü tso.

¹²No kiüdi puo cakhako bierhuowata di chau nu kevo khe bu puosi riewata ga?

¹³Ketsa nu menyi bu puo menyüwate, kemele pete süu pie u ca chü.

¹⁴Rürei la shücie, he-i Krodiko Kepenuopfü; Teigei nu mehoshü di khube hau le lashücie.

¹⁵N dzie n zatsa thuo sekeshü mvüu.

¹⁶Ukoe mi pie süu thewate, ukoe süu wiwate, noe kerhiekeshü la n themiako ruote.

¹⁷N dzieu bu n zatsa kethau gei balie, n thuo n la chü pekuokelie themia nuou gei!

¹⁸Sitse hie n ki nunu rürei latalie lho zo; hie chü perheishücie, siro hie n za kietuo.

¹⁹Hie chü pevi lashücie, he-i, krodiko Kepenuopfü; n zie bu hie gei zieshücie, hie kelalieketuo la.