Read Angami Naga Chieliko 81 Bible Online

Chieliko 81 - Angami Naga bible

Chieliko 81

¹Keli peto pie u kekuo Ukepenuopfü ki shülie, kenei la shiepie Jakob Kepenuopfü ki shülie.

²Tsali puo sedelie, tambourin kekreishülie, u kenei harp mu lyre pe di.

³Thekhrü kesa ki, khrüluo ki, mu u nyi zha nhie ketsü khoushülie.

⁴Süue Israel zhokecü la, Jakob Kepenuopfü zho zo.

⁵Puoe süu Josef gei thezho puo chüshü, puo Ijipt kijü nu kevo ki.[52] A siya kemo mhapfhe puo si:

⁶“A n bouka geinu n pieu lhouwa; merhau nunu n dzienie se parshü.

⁷No kemezhiekelie ki melieshü, ru a n kelashü; a teikese kepekhre chü nunu n die kelashü; a Meriba dzüko nunu n dojüshü. Selah

⁸Rünyüliecie, harie a themiako, a nie tarho ketha ki! He-i Israel, no a pfhe rünyülietuoü ro;

⁹Terhuo kekrei puorei nie donu balie lho; no nuketsu si kemo rhuo puorei rüsuolie lho.

¹⁰A Jihova, n Kepenuopfü, Ijipt kijü nunu ze parkeshüu; n tie mekuo kemeyashücie, sitse a süu tshushütuo.

¹¹“Derei a themiako a pfhe rünyü mote; Israel-e puo khapie a tsütuoü mote.

¹²Süla a uko khapie uko nou kere nu shüwa, uko bu uko medoko nu tuotaketuo la.

¹³A themiako a pfhe rünyülieücü we! Israel-e a chako nu tuolietuoücü we!

¹⁴A uko ngumvüko penyü mhaishütieciü, mu a dzie pie uko ngumvüko petsoutieciü.

¹⁵Jihova ngu mecüyakezhako puo mhodzünu nu rünhe ketatuo, mu uko siazha we kechachie ba sei zotuo.

¹⁶A thoulha kememhiethopfü pie n va chütuo; mu tsiekrie geinu kepar mepfhidzü pie n kelhuo chüshütuo.”