Read Angami Naga Chieliko 83 Bible Online

Chieliko 83 - Angami Naga bible

Chieliko 83

¹Harie Kepenuopfü, kemekrie bata hiecie; zei-ipfü bata hiecie, he-i Kepenuopfü!

²Kekreilamonyü n ngumvüko kebou bate; tsiu n mecükezhako u tsü pengopie tuote.

³Uko n themiako ngumvü di kedodakecü chüya, mu uko keze di noe yalieketako ngukemvü rhüya.

⁴Ukoe puyie, “Khe, seyieu bie pejüwa khe; Israel za rükra motaketuo chüwa khe” iya.

⁵Ukoe die puo chü keze kerüchülieya; n ngukemvü diekho puo chüliete.

⁶Edommia mu Ishmaelmia pfhekiko, Moab mu Hagritmiako,

⁷Gebalmia, Ammonmia, mu Amalekmia, Filistinmia mu Tur nu kelhouko sa.

⁸Asiria rei uko saliete, uko Lot nuonuoko chü pekuoshüketuo la. Selah

⁹Midianko gei chükeshü tuoi uko gei chüshücie, Sisera gei mu Jabin gei Kishon rükhie kinu chükeshü tuoi,

¹⁰En-dor nunu süko pekawa, ukoe kijüu la thebuo chüte.

¹¹Uko krütako chüpie Oreb mu Zib tuoiwacie, uko kedi nuonuoko pete bu Zeba mu Zalmuna tuoitacie;

¹²ukoe pucü, “Ukepenuopfü rituoko liepie u thuo u vie chülieta khe” iya.

¹³Harie a Kepenuopfü, uko chüpie khriewhi nyophe tuoiwacie, teikhrie mhodzünu shübe tuoiwacie.

¹⁴Mi-e ketsa thewayakezha tuoi, miüe kijüthou theshüyakezha tuoi;

¹⁵N khriedi se uko whuocie, n khriedi pie uko bie kemidewacie.

¹⁶Thenga pie uko zie zewacie, sitse uko n za pfhülietuo, he-i Jihova!

¹⁷Uko bu thenga chütacie mu u ziejü sei tuotacie; uko bu kemenga di katacie.

¹⁸Uko bu n rübei, puo zae Jihova cüu siliecie, kijü pete mho Kerükrietho-u.