Read Angami Naga Chieliko 84 Bible Online

Chieliko 84 - Angami Naga bible

Chieliko 84

¹N kebachüu kide u nei shi, harie krodiko Jihova!

²A ruopfüe Jihova kitiezhako menguya, mengupie phisiaya zo; a melou mu a chüe kelipie rhei keba Ukepenuopfü kieya.

³N ruosuobau nu ciekhrienuoko u ki ngulie, mu kitienuoko u thuo u kru chülie puo nuonuo bu rüselieketuo la, harie krodiko Jihova, a kediu mu a Kepenuopfü.

⁴N kinu lhoukezhako theja kepfümia zo, süko we n tshe sei ba zo. Selah

⁵N geinu kuo kebaue thejakepfümia zo, Zion nu kevo cha puo nou tuo.

⁶Uko Baka razha pfüthe kevo ki, süu pie dzüluo chü puo chüshü, teirü kerieu dzü pethoushüya.

⁷Ukoe kekuo sie kuolielieya; Zion nu keba peteko Ukepenuopfü mhodzünu thalie kemochie.

⁸Harie krodiko Kepenuopfü, Jihova; a kecha rünyücie; harie Jakob Kepenuopfü. Selah

⁹Harie Kepenuopfü; hie zhüu; noe kenhekelieu zie mehoshücie.

¹⁰Khunhie n kitiezha nu keba we, kekreira thenyie-e ki vikuo. A we kerüzhüko pfheki nu lhoucüu ki rei, Ukepenuopfü kicie kepfheu chü keba we a neikuo.

¹¹Ukepenuopfü Jihovae niaki mu pezhü zokecü la; puoe ngukemezhie mu therhu khashüya. Kemezhüko la we, Jihovae mha kevi khase bataya mo.

¹²He-i krodiko Jihova, n pelekezhamia sü thejakepfümia zo.