Read Angami Naga Chieliko 85 Bible Online

Chieliko 85 - Angami Naga bible

Chieliko 85

¹Jihova, noe n kijüu gei vishüte, no Jakob ruo chü pekuo lashü.

²No n themiako kemou vashü, no kephouma pete whewa. Selah

³No n nouyie pete late: n nouyie kemeriekecüu nunu rüreite.

⁴Hie chü pevi lashücie, harie hie kelakelie Kepenuopfü, sidi hie gei n nei kemo pejücie.

⁵No hie gei n nei mo sei tuotuo me? N nouyie bu thephou pete gei pfütuo me?

⁶No hie chü perhei lashü lho me? n themiako bu n geinu u neituo.

⁷He-i Jihova, kelakejü n kekhrieu pie hie pekieshücie, mu n kelakelieu pie hie tsücie.

⁸Ukepenuopfü Jihovae puketuoko a bu rünyücie; puoe noune pie puo themia, kepeleko, u nou rüditaya kemoko tsüyie ru.

⁹Ketho zo, kelakelie sü puo preikezhako penuo ba zo, puo zayie bu kijü nu balieketuo la.

¹⁰Kekhrie mu ketho nie-e kesetuo; kemiatho mu noune nie-e kemebotuo.

¹¹Kethoe kijü nunu siertuo, mu kemiathoe teigei nu mehotuo.

¹²Jihovae keviu khashütuo, mu u kijüu puo lieyie kralietuo.

¹³Kemiathoe puo mhodzü votuo, sidi puo phichako la cha keseshütuo.