Read Angami Naga Chieliko 86 Bible Online

Chieliko 86 - Angami Naga bible

Chieliko 86

¹N nyie kedeishü di a pfhekhoshücie, he-i Jihova, a mhajü mu tsopfhücü la.

²A kelhou pekrushüyi, a n pfhü tuoya ze ru; n peleyakezha n kituou kelashücie. No a Kepenuopfü zo;

³A ngumezhiecie, he-i Jihova; a zhate meliepie n ki shü ba zocü la.

⁴N kituou nou va pemvüshücie, he-i Jihova, a a ruopfü pie sie n tsüshü.

⁵He-i Jihova, no vi mu kejo vashüya, n kiekevormia pete gei n kekhrie khashü.

⁶He-i Jihova, a kecha gei n nyie kedeishücie; a mezhie rünyüshücie.

⁷Kemezhiekelie nhie a n kietuo, no a pfhe khoshü zoketuo la.

⁸Harie Jihova, terhuo puorei n kemhie tuo mo, morei mhatho puorei n kemhie tuo mo zo.

⁹He-i Jihova, no chükeshü seyie pete vor n mhodzünu n rüsuotuo, sidi n za chü kemeyieshütuo.

¹⁰Noe zha zo mu u ngocü mhathoko chüshüya; n rübei Ukepenuopfü zo.

¹¹N chau pie a pethashücie, he-i Jihova, sitse a n ketho-u nu tuolietuo; n za rhulieketuo la a melou kemete puo chüshücie.

¹²A a melou pete se n thezietuo, harie Jihova a Kepenuopfü; a telhe kechachie n za se kemeyie tuo tsotuo.

¹³A gei n kekhrieu zha ze; no Sheol kesou nunu a ze parshü.

¹⁴Harie Kepenuopfü, kethesükecümia a petsou sierte; kerüzhakecü kro puoe a kerheiro pfhü tuote, ukoe n pie u mhodzünu shüya mo.

¹⁵Derei Jihova no we mia ngumezhie mu nouzhie nyi, n nou cha, kekhrie mu kemiatho nyi.

¹⁶A kitsa vacie di a ngumezhiecie; n kekuo pie n kituou tsücie, mu n kituopfü nuou kelashücie.

¹⁷N kenei zasi pie a kiecie, sitse a ngu kemecüko süsü ngu di mengalietuo, kekreilamonyü Jihova noe a khruoshü mu a nou thupeluoshü.