Read Angami Naga Chieliko 89 Bible Online

Chieliko 89 - Angami Naga bible

Chieliko 89

¹A Jihova kekhrie rüdirüliya kemo pie keli sei tuo zotuo, a tie üse n kedietho pu thephou pete pesituo.

²N kekhrieu kechachie la pesieliete, n kemiathoe teiko tuoi metei.

³No pucü, “A kedakelieu ze dietseidiekho puo chülie, a kituou David ki rüseshü,

⁴‘Ae kechachie la n se n yie pesieshütuo mu n kedibau thephou pete nu chü kemeteishütuo.’ ” Selah

⁵Teiko bu no u ngocüko tsheliecie, he-i Jihova, tsiu kemesako kro nu n kedietho tshecie.

⁶Teimeluo nu rei supuo pie Jihova ze kemejülie ta? teigeimiako supuo Jihova mhie mu?

⁷Kemesako kehou nu rei Ukepenuopfü we preiya zo; puo khieümhou kebako pete kirei zha mu kemeriekuo.

⁸He-i Jihova, krodiko Kepenuopfü, He-i Jihova, supuo n mhie di kuo ga? N kedietho sü n houpfü baya.

⁹No dzükezha noupfhüu kekhaya; süu rüpfhü kesie ki no kekha zeiwaya.

¹⁰No Rahab kedepie kesiamo tuoiwa; no n bou kekuo üse n ngumvüko phruo kecürewate.

¹¹Teiko n vie, mu kijüu rei n vie zo; no kijüu mu sünu ketuo kheko chüshü.

¹²Pesotsa mu pekhrotsa rei,[54] noe chüshü; Tabor mu Hermon u nei di n za tsheya.

¹³N bou kuo phi; n dzie-e kuo, mu n zatsae rükrie.

¹⁴Kemezhü mu kediethoe n kediba mvüdze zo; kekhrie mu kemiathoe n mhodzünu tuoya.

¹⁵U nei keba thepfheu sikezha themiako thejakepfümia zo, sümia n zie kezieu nu tuoya, harie Jihova.

¹⁶Uko n zau nunu zhate u nei baya. Uko n kemiatho-u nunu u nei phiya.

¹⁷No sü uko zayie mu kekuou zo, n neikelie la no hie kia chü kerükrieshü.

¹⁸Hie zhü sü Jihova vie, mu hie kedi-e Israel kemesau vie.

¹⁹No ziemho nunu n kemesako ki mhapu di, “A keditsüre[55]pie kekuomia puo gei shüshü; A themiako donunu kedakelie puo chü pezhashü.

²⁰A a kituou David ngulie, Ae kemesa tier pie puo kenheliete.

²¹A dzie puo ze sei tuotuo; a bou puo chü pekuoshütuo.

²²puoe ngumvümia do lhotalie lho; morei kerüzhümia puo pie ketheselie kenjü.

²³A puo mhodzüki nu puo ngumvüko kedeshütuo; mu puo mecüyakezhako kepfhüwatuo.

²⁴Derei a dietho mu jütalie kelho kekhrie-e puo ze tuo zotuo, mu a za nunu puo kia chü kerükrieshütuo.

²⁵A puo dzie pie dzükezha mho shütuo, mu puo dzie puo zatsa pie kerüko mho shütuo.

²⁶Puo a kie di, ‘No a puo, a Kepenuopfü, a kelakelie Tsiekrieu!’

²⁷A puo chüpie a nuorieu chüshütuo, kijüu kediko donu kerükrietho-u.

²⁸A puo khrielekhriethor zotuo, mu a puo ze dietseidiekhokelieu metei tha zotuo.

²⁹A kechachie la puo tsiau pesieshütuo, mu puo kedibae teiko kebachie batuo.

³⁰Mhanuü puo nuonuoko a zho khawa mu a die khakeshüko nu tuolie moketa sie;

³¹Uko ahzako varhuo mu a diekhakeshüko ze mota üro;

³²A seiro se di uko kekrükecüko pechütuo, mu uko kemou la thepetheruo khashütuo;

³³derei kekhrie nunu puo khawa lho, a dietho-u nu tso moketa chülie lho.

³⁴A a dietseidiekho-u varhuowalie lho, a tie nunu parketau rhü lawalie lho.

³⁵A va puo a kemesau gei nu rüseshüwate; mu a David gei tijüshü lho.

³⁶Puo tsia bu kechachie tuo zotuo, mu puo kediba bu a mhodzünu niaki tuoi batuo.

³⁷Süu chüpie khrü tuoi ba sei zotuo, teigei kedietho zhapuu.” Selah

³⁸Derei no puo khawa mu puo meliewate, noe kenhekelieu gei n nou meyie phite.

³⁹No n kituou ze dietseidiekhokelieu rhüwate, mu nyophe nunu puo keditsüreu perhuwate.

⁴⁰No puo sozhako pete bierhuo, mu puo kudako pekaperuowate.

⁴¹Kekhokeke pete puo vie va, puo zanuomia krenyü chüte.

⁴²Noe puo ngumvümiako dzie thezatsa chü pezhashüte, no puo ngumvüko pete bu u nei.

⁴³Noe puo zhiecha puoütsa kereiwate, terhü nu puo khruohishü mota.

⁴⁴No puo dzie nunu kedi theu chüwate, mu kedibau kelhoupie nyophe nu shüwa.

⁴⁵No puo khriesa zhako da pedzüwate, thenga pie puo zewate. Selah

⁴⁶Jihova, kichiepuo tieya mu? No kechachie n thuo n kevie se tuotatuo me? N noupfhü bu kichiepuo mi tuoi tu ba zotieya ga?

⁴⁷A kelhouu kide dzü shi rükrashücie. no kidi kemethuo puo la themia chüshüte mu?

⁴⁸Supuonie kesia ngu mo di rhei volie vituo mu? morei mekhru kekuo nunu puo kelalie vituo mu? Selah

⁴⁹He-i Jihova, n kekhrie kerieu kirapuo tuota ga? N kedietho kikecü nunu no David ki rüseshü ga?

⁵⁰Rükrashücie, he-i Jihova, n kituou krekecüko, kimhie di a nou nu themiako a kengakecüko pfü ba shi!

⁵¹He-i Jihova, n ngumvüko kedipuo se n kenga shi! kedipuo se noe kenhekeshü chaprako kenga shi!

⁵²Telhekechachie Jihova bu thetshekepfü chücie! Amen mu Amen.