Read Angami Naga Chieliko 90 Bible Online

Chieliko 90 - Angami Naga bible

Chieliko 90

¹Niepuu, thephou pete nu hie kebachü chü vor zo.

²Kijüthouko kesier mhodzü, morei kijüu chü kepar mhodzü, kechachie nunu kechachie ketso no sü Ukepenuopfü zo.

³No themia chüpie nyophe chü lawa di, “La nyophe nu votalie, themianuo” isishü.

⁴Teicie nyie puo rei n mhodzüki we, ndu vota ro süu mhie zo, theva rükhou puo mhie zo.

⁵Noe uko tshowaya; ukoe umho tuoi zo, nha rheirhiei ba khise ngukecü tuoi;

⁶khise gei the kesa sier ürei, thevatie süu ra mu kitaya.

⁷N nouyieu nunu hie the pejüwa mu n noupfhüu nunu hie bienhewate.

⁸No hie kejokemouko pie n mhodzüki shüliete, hie pekhre phoumako pie n zie kezie nu shüliete.

⁹Hie teisozhako pete n nouyie nu vote; hie teicieko meheimelokecü nunu pevo.

¹⁰Hie teisozhako sü cie hiethenie zo, hie kekuo ba üro cie hiethetha; zhako rei mhatho kere mu nousuo zo; süko vo mhataya, mu hie pruotaya.

¹¹Supuonie n nouyie kekuou si ga? N nouyie-e zhapie n preikezhüu de zo.

¹²Hie bu hie teisozhako phrü toulieketuo pie hie pethashücie, sitse hie mhakesi melou ngulietuo.

¹³Rürei vorcie, he-i Jihova, kichiepuo tuo mu? N kituoko ngu mezhiecie.

¹⁴Khise n kekhrie jütaya kemo-u pie hie kelhuo chüshüyi, sitse hie teisozha peteko nu hie kenei pfü keli mu hie noumvütatuo.

¹⁵No teisozha kekra hie pechükeshü mhiei, teicie kekra hie bu kemezhiekecü ngukewa tuoi, hie bu süthede hie noumvücie.

¹⁶N mhathoko pie n kituoko pesi, mu n zayieu pie uko nuonuoko pekiecie.

¹⁷Jihova hie Kepenuopfü keneiu bu hie gei vor üthienyü; hie dzie mhathoko bu vikehieliecie; he-i, hie dzie mhathoko bu vikehieliecie.