Read Angami Naga Chieliko 91 Bible Online

Chieliko 91 - Angami Naga bible

Chieliko 91

¹Nie Kerükrietho-u khrükhro lhoukezhako, Kekuotho-u[56] khrü rüzhüpfükezhako.

²Jihova ki, “Puo a keyau mu a dahouu, a puo peleyakezha a Kepenuopfü zo” ituo.

³Puoe ratho-u ciephrie mu siatalie kevi thepe nunu n kelashütuo.

⁴Puoe puo shüka pie n yalietuo, mu noe puo shü khro nu rüzhülietuo; puo kemiatho sü n zhü mu n keya zo.

⁵No theva gei kemeriekecü preilie lho, morei khinhie gei pruoyakezha theütsie shierei;

⁶Kezei nu tuoyakezha thepeu, morei khinhieluo mha pekayakezha thesau rei.

⁷Thenyie-e n tseitsa tetsuta, mu nyie ker n zatsa tetsuta rei; süu n penuo vor lho.

⁸No we n mhi üse mehokecü zotuo, di kerüzhüko gei siazha khakeshü ngutuo.

⁹Kekreilamonyü no Jihova pie n keyau chüliete, kerükrietho-u pie n kebachü chükelie la.

¹⁰Mha kesuo n gei vorlie lho, kepeka rei n pfheki penuo vor lho.

¹¹Puoe puo dielieko bu n cha peteko nu n vaphilienu shütuo.

¹²Ukoe uko dzie nunu n pielietuo, sitse ketsie geinu n bu n phi kesewa molietuo.

¹³No loshau mu teinyhüu kedetuo; no losha nuonuo mu teinyhü n phikhro nu kedetuo.

¹⁴A khrieyakezhamia, a sümia kelashütuo. A uko yalietuo, uko a za siyacü la.

¹⁵Uko a kietuo, mu a uko pfhekhoshütuo; uko kemezhiekelie ki a uko ze tuotuo; a uko kelashütuo, mu uko rhushütuo.

¹⁶A rheikecha üse uko kelhuo chüshütuo, mu a kelakelie pie uko pekieshütuo.