Read Angami Naga Chieliko 92 Bible Online

Chieliko 92 - Angami Naga bible

Chieliko 92

¹Jihova theziekecüe viwe, ketshe tsali chüpie n za tshekecüe vi, he-i Kerükrietho-u.

²Khise gei no hie khrielekhriethorkecü, mu theva gei n dietho pesikecü,

³übou lyrepfü se mu harp pfhe kemesü se di.

⁴Jihova, n mhathoko nunu a bu a neilie; a n dzie mhathoko la a kenei pfü keliyawe.

⁵N mhathoko kide zha shi, he-i Jihova! N nouleko sou ze!

⁶Mhalekemo themiau we haha siya mo, morei kenyau rei lelieya mo.

⁷Kelhiekecümia thuo nha tuoi thesier rei, mu kerüzhümia pete kruosieta ürei, uko kechachie kepeka ngu zotuo.

⁸Derei Jihova, no we kechachie rükrie zotuo.

⁹Harie, Jihova, n ngumvüko we; n ngumvüko we kata zotuo: kesuokechümia pete cüreta zotuo.

¹⁰Derei noe a kia chü kerüka pie nhathu kia tuoishüte; tier kesa pie a tsü kenheshüte.

¹¹A mhi-e a ngumvüko tetsuketa ngu; a nyie-e a ngumvü kerüzhüko pekakewa site.

¹²Kemiathomia kukuo bo tuoi kruolietuo; lhoupie Lebanon nu sedar tuoilietuo.

¹³Uko leipie Jihova kiu nu shüshü, Ukepenuopfü kiluo nunu uko kruo sielietuo.

¹⁴Uko botsa vota rei uko si vüshü zotuo, uko pejo mu rheirhie ba zotuo;

¹⁵di, Jihovae mezhü; mu a tsiekrieu ücü pekie tuo zotuo, puo nou miatho kemo puorei jü ücü pesishütuo.