Read Angami Naga Chieliko 96 Bible Online

Chieliko 96 - Angami Naga bible

Chieliko 96

¹Harie tsali kesa puo chüpie Jihova ki shücie; kelipie Jihova ki shülie, kijü pete.

²Kelipie Jihova ki shülie, puo za tshelie; teikeso nhie puo kelakelie pesishü ba zolie.

³Seyieko donu puo zapuzayieu pesishülie, puo mhatho u ngocüko themia peteko ki.

⁴Jihova zha mu puo tshe phi zhücü la; terhuo peteko mho puo prei zhü.

⁵Seyie rhuoko we pete miarhi zocü la; derei Jihovae teiko chüshü.

⁶Therhu mu kemesü puo mhodzü ba; kekuo mu zivi-e puo kemesa chü nu ba.

⁷Pie Jihova tsülie, nie themia seyieko, kekuo mu zapuzayie pie Jihova tsülie.

⁸Pie Jihova tsülie, puo zae ngulie kezhü therhu se; mha khakeshü se vorlie, di puo kiluo nu vorlie.

⁹Kemesa pfhenei se di Jihova rüsuoliecie; kijüu pete, puo mhodzünu pe zolie.

¹⁰“Jihovae kedi” ücü seyieko donu pushülie! Kijüu se kemetei pie bawate, süu mhakipuorei rünielie lho. Puoe ketou nu themia nyie pepituo.

¹¹Teiko bu u neilie, mu kijüu bu puo noumvülie, dzükezhau mu sünu ketuoko bu ruorüilie.

¹²Lieko mu sünu ketuo khe bu u nei philie; sitse ketsa nu seiboko pete rei u kenei pfü kelituo.

¹³Ukoe Jihova mhodzünu kelituo, puo vorzhücü la, puo kijüu nyie pepiketuo la vorzhie. Puo ketho mu kemezhü se di kijüu mu seyieko nyie pepituo.