Read Angami Naga Chieliko 98 Bible Online

Chieliko 98 - Angami Naga bible

Chieliko 98

¹Harie, tsali kesa puo chüpie Jihova ki shülie; puo u ngocüko chükeshü la; puo dzie puo zatsa mu puo bou kemesau.

²Jihovae puo kuokelie pie pesishüte; mu puo kemiatho pie seyieko pekieshüte.

³Puoe Israel kinumia gei puo kekhrie mu puo kedietho rükralie. Kijü kela petekoe Ukepenuopfü kelakelie nguwate.

⁴Kijüu pete kenei pfhe puo chüpie Jihova tsülie, nie kenei la melie mu kelishülie, u, ketshe tsali chülie.

⁵Harp se di ketshe tsali chüpie Jihova ki shülie, harp se mu tsali chü di.

⁶Ketsü mu tekuokia khou di kenei pfü shie Jihova u kediu mhodzünu vorlie.

⁷Dzükezhau mu sünu ketuo khe bu ruorüilie; kijü mu sünu lhou ketuo khe rei.

⁸Dzüdiko bu dziedalie; kijüthouko bu keze u nei di kelilie.

⁹Ukoe Jihova mhodzünu kelituo, puo vorzhücü la. Puo kijüu nyie kecüketuo la vorzhie. Puo ketho mu kemezhü se di kijüu mu themiako nyie kecütuo.