Read Angami Naga Chieliko 99 Bible Online

Chieliko 99 - Angami Naga bible

Chieliko 99

¹Jihova di ba; seyieko bu peliecie; puoe Cherub nie donu di ba; kijüu bu rünietalie.

²Jihovae Zion nu zha ba; mu puo seyie peteko mho rükriewe.

³Uko bu n za kezha mu kemeriekecüu tsheliecie; puoe mesa.

⁴Kediue zha, puo kethoca puo nei, puoe thetou pesieshü. No Jakob gei kedietho mu kemiatho chüshü.

⁵Nieko Ukepenuopfü Jihova chü kerükrieliecie, mu puo phibanu rüsuolie; puoe mesa.

⁶Puo zievoko donu Mosa mu Aron, mu puo za kieyakezhako donu Samuel; uko Jihova kie ru puo uko pfhe khoshü.

⁷Puo kimhou co-u nunu uko rüchü; uko puo zhapu die, mu puoe khapie uko ketsü thezhoko se tuolie.

⁸No uko pfhe khoshü, harie hie Kepenuopfü Jihova; noe uko kejo vashüyakezha Ukepenuopfü, derei uko mhatho kesuoko la we siazha khashüyakezhau.

⁹Nieko Ukepenuopfü Jihova chü pezhaliecie, mu puo kemesa kijüthouu geinu rüsuolie; Ukepenuopfü Jihova mesacü la.