Read Angami Naga Mhasidie 1 Bible Online

Mhasidie 1 - Angami Naga bible

Mhasidie 1

¹David nuou Solomon, Israelmia kediu mhasidie:

²Themia bu mhasi mu kepethadie silieketuo, tsiu mhacamhala silieketuo la,

³mhasi mu kepethadie puotou, kemiatho, kethoca, kede mu kemo rhi silieketuo la;

⁴mhasikemomia bu mha silieketuo, mu khriesarüümia bu mhacamhala kevikesuo si kekreilieketuo;

⁵mhakesimia bu kerünyü nunu mhasi miemielietuo, mu mhakelemia mhasi doko si salietuo,

⁶mhasidie tsiu puoca vatshakeshü silieketuo; mhakesimia dieko mu dievi kesouko silieketuo la.

⁷Jihova khrü keprei-e mhasi bode zo; sirei mhalekemomiae mhasidie tsiu kepethadie rütseya.

⁸A nuo, n puo n tarhokeshü dieko rünyüliecie; tsiu n zuo kepetha die khawa hiecie;

⁹kekreilamonyü sükoe n tsügei rütsonyie kezivi tuoi, mu n vo nu pienyie zocü la.

¹⁰A nuo, kephoumamia n ketsi shierei u pfhekhoshü hie.

¹¹Mhanuü ukoe sie, “Vorlie, úko thezie pekru khe, úko puocapuola jü zorei pekhre kejokejüko rü khe;

¹²mekhru tuoi tsiu thekhe kesou nu ketsu tuoi pecho süko mezulie khe.

¹³We mhanya puoma kere pete ngulietuo, mu vakelie nyako se u kiko tshulietuo.

¹⁴No rei n khapie hie kro nu shüliecie; úko pete likhuo kerhetuo mu” irei,

¹⁵a nuo, no uko cha nu vo hiecie; n phichapie uko cha nu shü hie;

¹⁶kekreilamonyü uko phi-e mha kesuo chatsa voya; tsiu thezie pekrutuoü rhürhü tuoya.

¹⁷Kebie pethoupie zhü rei kemethuo zo; perau süu ngu keba sie;

¹⁸derei ukoe u thuo u zie pekruketuo, mu pekhre di u thuo u kerheiro liewaketuo pfhe ba zo.

¹⁹U meda suo di mha mehoukecümia pete hai di thela[1] chü zotuo; süu thuo u kerheiro chüsetaya.

²⁰Mhasi-e cha nunu shiekhoui zo di, ziekeko nunu shiekhoui tuo zo.

²¹Kemereitho chüu nunu puoe shieshü; nadi khru nunu puoe diepu di sie:

²²“Mhalekemoko, nie kichiepuo mhale mo ba zotuo ga? Mia kre zo ba rei nie nei tuo ga? kemeloko kichiepuo mha kesikele mecü batieya ga?

²³A n kerhie di pethakeshü lecie, a kele rupie nie ki shüya, a dieko pie nie pesishütuo.

²⁴A nieko kieshü rei nie mvüte, a dzie yhashü rei miapuorei rünyü mo,

²⁵nieko a kepetha die üse mhathomharo kemo chüwa, mu a ruo di pethakecü die puorei lielie mote,

²⁶süla nie kemezhiekelie ki a rei nyü batatuo; mu kemichie nie gei kevor ki a rei nieko kretatuo,

²⁷kemichieu khriedi nie vakecü ki mu kepekau khriewhi tuoi nie gei kevor ki, kemezhiekecü tsiu thenoukesuo nie gei kevor nhie,

²⁸sitse nie a kietuo, derei a nie khoüshü lho, uko rükrei sie a pfhütuo, sirei uko a ngulie lho.

²⁹Kekreilamonyü uko mhasi ngumecüte, mu Jihova khrüprei kedalie mote;

³⁰ukoe a kepetha die puorei lie mvü mu uko ruokeshü pete rütsete.

³¹Süla ukoe u mhatho kesuo siu cüükrietuo, mu uko mhatho nu ketheguotuo.

³²Cha vajokewa thuo mhasikemomia dukhriwatuo, mu mha mo icüu thuo mhalekemomia pekawatuo;

³³derei kehoupuorei a pfhe kerünyümia khrukhre batatuo, mu lhou rüütatuo, kepeka prei lho.”