Read Angami Naga Mhasidie 11 Bible Online

Mhasidie 11 - Angami Naga bible

Mhasidie 11

¹Mha se ketou kemoe Jihova mhodzünu kerütse zo, derei mha se ketoukecü roshükhou puo neiya.

²Kemiakokecü sie thenga vorya, derei mhasi-e rünuo menekecümia gei baya;

³Kemezhümia u miatho-u thuo u chathalietuo, derei kecürümia u thuo u pekawatuo.

⁴Noupfhünouyie teiki kemevi vorya mo, derei miathokecüe kesia nunu kelalieya.

⁵Kejo kejümia u miatho-u thuo u chatha kemezhülieya, derei kerüzhümia u thuo u kesuou nu tetsutaya.

⁶Kemezhümia u miatho-u thuo u kelalietuo, derei kecürümia u kemou thuo u telietuo.

⁷Kerüzhümia siaketa ki, puo kemerüu kaüjütaya tsiu mezhükemomia kemerüu kemethuo chütaya.

⁸Kemiathomia kemezhiekecü nunu u kelalietuo, derei süu sounu kerüzhümia letaya.

⁹Themia kesuomia tie-e puo zanuomia pekawaya, derei mhakesi kele geinu kemiathomia kelalietuo.

¹⁰Kemiathomia puotou chü keba ki rünau u nei baya, mu kerüzhümia kaketa ki, mia nei di shiekhouitaya.

¹¹Kemezhümia theja la rünau chü kemeyielieya derei kerüzhümia me-e süu pekawaya.

¹²Mhasikemomia mia le pecüya, derei kemeciemia zei baya.

¹³Diethodieruo puyakezhamia pekhre se balieya mo, derei pelekesümia mha kepekhreko kevie se balieya.

¹⁴Chatha kejüra seyieu tetsutaya, derei rüchümia kenyira khrukhrekecü ba.

¹⁵Sikemomia puo pie pfüshütuoü puo die phrakeshümia puo thuo puo die la kemezhielietuo, derei sikemomia la puo die khashükemomia mha keprei jü.

¹⁶Noushünouzhie kenyipfüe therhu ngulieya, derei metekemopfü thenga ngulieya. Kemichiemia meretaya, derei kethepfumia nyilieya.

¹⁷Mia ngumezhieyakezhamia puo thuo puo la mha kevi ngu lalieya, derei u zhokesuomia puo thuo puo pechülieya.

¹⁸Kerüzhümia mia seketsikecü zhakhra ngulieya, derei kemiatho prushüyakezhamia zhakhra kevi ngu toulie zotuo.

¹⁹Kemiatho nu tha kemeteikeliemia rheilietuo, derei mha kesuo whuokezhümia siata zotuo.

²⁰U nou keremia Jihova rütseya, derei cha kemezhü nu ketuomia puo neiya.

²¹Hau si touliecie, kelhiecümia siazha ngu motalie lho, derei kemiathomia we süu therhielietuo.

²²Mha kevikesuo si kreilieyakemopfüe suna nyiekha pie thevo nyhüca nu keshü tuoi zo.

²³Kemiathomia mengue mha kevi rübei pie puo thela chüya, derei kelhiecümia kemerüu we noupfhünouyie zo.

²⁴Mha methuo se mia tsü mia zayakezhamia nyi miemielieya, mephruomevuo kemomia mhajü miemietatuo.

²⁵Themia mephruomevuokecüu chü penyishütuo, mu dzüpie mia ketsüu dzü ngutuo.

²⁶Telha rüwe khapie kebamia mia puo rüsetuo, derei süu zeshüyakezhamia theja ngulietuo.

²⁷Mha kevi kechü nu keshürheimia mia neipfülieya, derei mia nei chüketuo kepfhümia kesuo ngutaya.

²⁸Kinyi peleyakezhamia rüwitatuo[12], derei kemiathomia seinyü kepejo tuoi kruolietuo.

²⁹Kikru bie kebvükezhamia teikhrie ka wetuo, mu mhasikemomia kesimia kituo chütuo.

³⁰Kemiatho si-e kerheibo zo, derei mia kemvü kechüe[13] kerhei chü setaya.

³¹Kemiatho zhakhra kijü nunu ngulie üro, kerüzhüko mu kephouma we kiüdi motuo ga?