Read Angami Naga Mhasidie 12 Bible Online

Mhasidie 12 - Angami Naga bible

Mhasidie 12

¹Kepetha puo neiyakezhamia kesikele puo neiya, derei puo kerhiekecü mecüyakezhamia kenyamia zo.

²Kevimia Jihova nei chülieya, derei puoe kesuo rhüyakezhamia pejoya.

³Mha kesuo geinu khrukhrekecü ngulie lho, derei kemiathomia we phewalie lho.

⁴Thenu kevipfüe puo nupfu tsüre zo, derei thenga krakeshüpfü sü puo nupfu ru nu cieketa mhie zo.

⁵Kemiathomia kelekoe puotouya, derei kelhiecümia kepethae mha se penyawaya.

⁶Kelhiecümia die sü these pie mia biekecü zo, derei themia kemezhümia die sü kelashüya.

⁷Kelhiecümia sü keka kelhouwaya, mu jütaya, derei kemiathomia kiu thalietuo.

⁸Mha rhikesimia, mia sümia le peviya, derei puo toukemo noule kesemia mecüya.

⁹Mia thuo puo pese rei kituomia nyikecüe puo thuo puo rhu di jüketuou ki vikuo.

¹⁰Kemiathomia puo kiriko se morokesuo siya, derei kelhiecümia ngukemezhie sü lhiecülhieve.

¹¹Puo thuo puo lie ciekeliemia puoca puova menyho, derei kemethuokemeruo whuoketuomia mha rhi si mo zo.

¹²Kerüzhümia puotou kemo kinyi mehouya, derei kemiathomia bo-e puosi vüshüya.

¹³Kesuomia puo thuo puo die nunu puo telieya, derei kemiathomia kemezhiekecü nunu talieya.

¹⁴Ume nunu kepar siu geinu mha kevi pie u kelhuo chülieya.

¹⁵Kemelomia thuo puoü mezhüü baya, derei mhakesimia we tarhokeshü die rünyülieya.

¹⁶Kemelomia nouyie vapuo nunu si mhailieya, derei kemenuomiae mia puo kepese die hielieya.

¹⁷Die ketho kepumia zhapu dietho, derei ketijü zhapu khakeshüe kelhiekecü zo.

¹⁸Die meyhuketae zhiecha pie rhükeshü mhie zo, derei mhakesimia meüe keshürho se vorya.

¹⁹Kedietho tie-e kechachie tuotuo, derei kemeda meüe do puo la zo.

²⁰Mha kesuo kerhümia melou nu kecürü baya, derei mha kevi rhüyakezhamia gei kenei baya.

²¹Kemiathomia gei mha kesuo vorlie lho, derei kelhiecümia gei mha kesuo thuo tshupfütuo.

²²Jihova mhodzü ki kemedamia tie sü kerütse zo, derei dietho di mhachü tuoyakezhamia puo neiya.

²³Kemenuomiae mhasi kevie se tuoya, derei mhasikemomia-e[14] u kemelo thashüya.

²⁴Keshürheimia dzie-e mha kekhatuo, derei kemecümia kemvü chüpie mhachütuo.

²⁵Thenou kemezhiekecü la thezie pesutaya, derei die kevi-e süu bu thenou mvülieya.

²⁶Kemiathomia die kevi se puo zemia ki puya, derei kelhiecümia chae mia se ketsiwaya.

²⁷Kemecümia puo chügei rei chaya mo, derei keshürheimia kinyi kevi ngulieya.

²⁸Kemiatho cha nu kerhei ba, mu cha sünu kesia jü.