Read Angami Naga Mhasidie 13 Bible Online

Mhasidie 13 - Angami Naga bible

Mhasidie 13

¹Nuo mhakesiu kepetha die rünyüya,[15] derei mha krenyüyakezhau puo kerhiekecü die rünyüya mo.

²Themia puo die geinu mha kevi cüükrietuo, derei kejokechümia mha keboukecü menguya.

³Puotie kekha se balieyakezhamia puo kerheiro se balieya, derei puo me mekuo kemeyakeshümia kepeka ngulietuo.

⁴Mhachükemecümia mha lie nyü baya, sirei mhapuorei ngulieya mo, derei keshürheimia nyilietuo.

⁵Kemiathomia ketijü mecüya, derei kelhiecümia menga kemo mu therhu kejü thoko chüya.

⁶Kemiathoe puo cha nu mezhütuoyakezhamia rüguo se balieya, derei kephoumae kerüzhümia penyüwaya.

⁷Mia puoe kenyi khrava baya, derei mhapuorei baya mo, kekrei puoe kejü khrava baya, derei kinyi kekra ba.

⁸Mia puo kerheiro rhalieketuoe puo kinyi zo, derei kejümia gei kemichie vorya mo.

⁹Kemiathomia mitue ziekruoi baya, derei kelhiecümia mitu we mhetaya.

¹⁰Mha rünyü mo kethesükecü geinu kegei vorya, derei tarhokecü die lieyakezhamia gei mhasi ba.

¹¹Dopuo nu[16] ngukelie kinyi-e tsa miemietatuo, derei rülili di krakelie kinyi-e kra miemielietuo.

¹²U kemerüu ngulie mota ro u nou suotaya, derei u kemenguu ngulie ro süue kerhei seibo puo mhie zo.

¹³Kehoupuorei dieu rütsekecümia pekawatuo, derei die khakeshüko rhuyakezhamia u zhakhra ngulietuo.

¹⁴Kesimia kepetha die-e kerhei dzüluo puo zo, süu kesia ciephrie nunu tapralieketuou zo.

¹⁵Kele kevi-e mia khrie pfülieya, derei kepele kejümia chae kepeka zo.

¹⁶Ketseiphreimia mha pete nu mhasimhale se mhachüya, derei mhalekemo-u puo kemelo hie lashüya.

¹⁷Diekesuomia kemezhiekecü kere se vorshüya, derei pelelie kesü dieliemia keshürho se vorya.

¹⁸Kepetha die lie kemvümia mhajü mu mengalietuo, derei kepethadie lieyakezhamia therhu pfülietuo.

¹⁹U kemengu ngukelie ki kenei u gei vorya, derei kemeloko we kesuo nunu takelie mecüya.

²⁰Kesimia zeketuomia mhasilietuo, derei mhalekemomia zeketuomia gei kepeka vortuo.

²¹Theruokesuoe kephoumamia whuo tuoya, derei kruokelie pie kemiatho zhakhra chütuo.

²²Kesimiae puo nuosenuoyie la rei kayie khapie tuoya, derei kephoumamia kinyi-e kemiathomia la kengupie keba zo.

²³Kejümia lie-e kecüca kekra khashülie vi, derei dietho kemoe süu khre setatuo.

²⁴Seiro sekemomia u nuonuo ngumecüya, derei u nuonuo khrieyakezhamia uko kepetha le terü tuoya.

²⁵Kemiathomia puo vavü ngulieya, derei kelhiecümia puo va methuo tuoya.