Read Angami Naga Mhasidie 14 Bible Online

Mhasidie 14 - Angami Naga bible

Mhasidie 14

¹Thenu mhakesipfüe puo thuo puo ki chülieya, derei kemelopfü puo dzie pie süu bierhuowaya.

²Kemiatho cha nu tuoyakezhamia Jihova preiya, derei u mecie kreiyakezhamia puo ngumecüya.

³Kemelomia diepue puo chie la seiro[17], derei kesimia tie-e süko rüguolieya.

⁴Thudo kejüra telha baya mo, derei thudo kekuo geinu lieyie kekra vorya.

⁵Ketho zhapue medalie lho, derei ketijü zhapue medakecü parya.

⁶Mia krenyüyakezhamia mhasi pfhü rei ngulie lho, derei puocapuola kesimia la we mhasimhale u la rüü phi.

⁷Mhasikemomia mhodzünu nu tuotaliecie, kekreilamonyü no puo geinu mha kesikele dieko ngulie kelho la.

⁸Ketseiphreimia mhasi-e puo voketuo cha silieya, derei kemelomia rhanyae cha tha kekrüshüya.

⁹Kemelomia kephouma ruosuo krenyü baya, derei kemezhümia we Ukepenuopfü medo puo neiya.

¹⁰Themia meloue puo thuo puo nou kesuo siya, mu sikemomia puoe puo keneiu se puo ze kezaya mo.

¹¹Kelhiecümia kiu pekawatuo, derei kemezhümia kiu balietuo.

¹²Mia puo mhodzü ki cha puo mezhükecü mhie zhüya, derei süu thelaue kesia nu kevo cha zo[18].

¹³Nyü keba ki zo rei thenou kesuo baya, mu u kenei thelatsa rei nousuo dzülietuo.

¹⁴U mecie kreicümia puo meda zhakhra ngulieya, mu kevimia puo mhatho kevi zhakhra ngulieya.

¹⁵Mhalekemomia mha pete peleya, derei ketseiphreimia puo kevocha meho menuoya.

¹⁶Kesimia menuoya di mhakesuou therhieya, derei kemelomiae u kekhakerelie mo di meyhutaya.

¹⁷Themia u nou meyie mhaitayakezhamia kenya mhatho chüya, mu kedodakecümia mia u ngu mecüya.

¹⁸Mha le pesouyakemomia kerhanyacü pie puo rütso[19] chüya, derei kemenuomia mhasi üse puo tsüla chüpfüya.

¹⁹Kesuomia kevimia mhodzünu nuketaya, mu kelhiecümia rei kemiathomia careko nu nuketaya.

²⁰Zanuomia rei kejümia ngu u neiya mo, derei kenyimia we puo zemia kekra baya.

²¹Zanuomia ngumecüyakezhamiae kephoumamia zo, derei kejümia ngumezhieyakezhamia u nei baya.

²²Mha kesuo rhüyakezhamia kekrüta moü me? mha kevi rhüyakezhamia ngukemezhie mu ketho-u ngulietuo.

²³Mhachü kemezhiekeshü pete nu kemevi ba phre, derei u tie pie kepu rübei zo we mhajütaya.

²⁴Kesimia kinyi sü puo tsüla zo[20], derei kekhranyakecü sü kemelo rütso[21].

²⁵Ketho zhapue kerheiro kelashüya, derei ketijü kepumia sü mia zekecümia.

²⁶Jihova khrükeprei-e nu u kepele meteilieya, mu puo nuonuoko rei u keya ngulietuo.

²⁷Jihova khrüpreikelie-e kerhei dzüluo zo, süu geinu mia puoe kesia bieu therhielietuo.

²⁸Themia krodi kedimia therhu, derei themia jü liro kedinuo-u kataya.

²⁹U nou chakecümia mhasimhale kesou puo gei ba, derei puo nou meyie mhatayakezhamia puo kenya pesishüya.

³⁰Thenou menekecüe uchü umo kerheiro zo, derei mia ngu u rokecüe uru bu cietaya.

³¹Kejümia peseyakezhau puo Chükeshüu peseya, derei Puo rhuyakezhamia kejümia ngumezhieya.

³²Kelhiecümia we puo mhatho kesuo thuo puo shükhrüwaya, derei kemiathomia puo miacümiatho geinu puo keya ngulieya.

³³Mhasi-e mhakelemia melou nu baya, derei süu kenyamia nou bacü siya mo.

³⁴Kemiathoe seyie puo chü pezhashüya, derei kephoumae kehoupuorei chü kethengashüya.

³⁵Kituomia mhasi di mha chükeshü geinu kediu nei kralieya, derei puo nouyie-e thenga krashüyakezhau gei voya.