Read Angami Naga Mhasidie 15 Bible Online

Mhasidie 15 - Angami Naga bible

Mhasidie 15

¹Menuo di mia die kelakeshüe noupfhünouyie bie kediwaya, derei die kere-e mia nou chü kemeyiewaya.

²Mhakesimia tie nu mhakesi die pu tou parya,[22] derei kemelomia tie se kerhanyakecü die hie lashüya.

³Jihova mhi-e thechü pete nu baya, sidi mha kevi rei kesuo rei ngu baya.

⁴Puo meü kemene-e kerhei seibo puo zo, derei die kere-e thenou bietshebietshawaya.

⁵Kemelo-u puo puo kepetha die mecütaya, derei tarhokeshü dieliekelieu vilieya.

⁶Kemiathomia kinu kinyi kekra ba, derei kelhiekecümia mha ngulieyakezhako gei kemezhiekecü vortuo.

⁷Mhakesimia tie-e mhasimhale keyieshüya, derei kemelomia noue silieya mo.

⁸Kelhiekecümia ruosuoe Jihova mhodzü ki kerütse zo, derei kemezhümia kecha puo neiya.

⁹Kelhiecümia chae Jihova mhodzü ki kerütse zo, derei puoe kemiatho whuoketuomia khrieya.

¹⁰Chau vajokezhamia siazha kere ngutuo, mu thatha lie mvüketamia siatuo.

¹¹Sheol mu Abadon thuo rei Jihova mhiki ba üro, themiako meloue kikidi motuo ga?

¹²Mia krekenyümiae pethakecü puo neiya mo; puoe kesimia ki rei volie lho.

¹³U noumvü ba ro u zie ziekruoi baya, derei u noukesuo geinu u shükerheiu ba motaya.

¹⁴Mhacamhala silieyakezhamia noue mhasi pfhüya, derei kemelomia tie-e mhasi kemo pie puo valuo chüya.

¹⁵Kejümia la we teisozha u la re zo, derei themia puo noumvü kebaue thenyi nyi sei baya.

¹⁶Mha huoyo se di Jihova khrüprei keba we, kinyi kekra se di kemezhie kebau ki vikuo.

¹⁷Ga chacü rei kekhrie ba ro, thudo keluo chacü di kengumecü kebau ki vikuo.

¹⁸Noupfhünouyie keremia kegei pesieshüya, derei u nou meyie mhatayakemomia kegeikecü kekhalieya.

¹⁹Mhachü kemecümia chae zohu thuo lhou tshupfü baya, derei kemiathomia chae chadi mhie mezhü zhüya.

²⁰Nuo mhakesiu puo puo bu puo neilieya, derei kemelomia u zuonuo mecütaya.

²¹Kesikele kejüu kenei-e kekhranyakecüu zo, derei mhacamhala siyakezhaue mezhü di tuotuoya.

²²Tarhokecü sa kemosie mharhüko kekrütaya, derei tarhokezhamia kekra kebara mhachükhrielieya.

²³Mia puoe die puotouu se mia die kelakeshü geinu puo kenei ngulieya, mu puotei touki die puotouu pukelie rei, kedipfü vi shi!

²⁴Mhakesimia la kelhouchau rükrie kholieya, sidi puoe kerünuotsa keba Sheol therhielieya.

²⁵Jihovae kemiakokezha ki bierhuowaya, derei puoe samipfü kijürie pekrushü.

²⁶Kelhiecüko mharhüu Jihova mhodzü ki kerütse zo, derei diekevi-e mesa.

²⁷Mhakemehoumia puo thuo puo ki bie kebvüwaya, derei theso rütseyakezhamia lhoulietuo.

²⁸Kemiathomia noue kedipuo pie mia die kelatuo shikecü leya, derei kelhiecümia me-e mha kesuo hielashüya.

²⁹Jihovae kerüzhümia mhodzü ki nu pecietuote, derei puo kemiathomia kecha rünyüya.

³⁰U mhi kezieue u nou bu u neilieya, mu thedze kevi-e u ruko chü kemeteishüya.

³¹U nyieto kedeipie kelhou dze rünyüyakezhamia mhakesimia donu batuo.

³²Themia kepethadie melieyakezhamia puo thuo puo rütsetatuo, derei kepethadie rünyülieyakezhamia mhasilieya.

³³Jihova khrüpreikelie-e mhasi chathau zo, mu u chü kerünuokeliemia therhu pfülieya.