Read Angami Naga Mhasidie 17 Bible Online

Mhasidie 17 - Angami Naga bible

Mhasidie 17

¹Mha huoyo se di kezevi kebau, kinu thehethehie tshupfü di kegei kebau ki vikuo.

²Kedie mhakesiue kethenga mhatho chüyakezha nuou kekhatuo, mu siezedzürie kayie kezakecü nu puo ya rei ngulietuo.

³Puo khou nunu rakachü lhoya, mi nunu suna thelieya, derei Jihovae u melou dojüya.

⁴Mha kesuo kechümia kerüzhümia die rünyüya; mu kemedamiae kelhiekecü die rünyüya.

⁵Mhakejümia kreyakezhaue puo Pelhoukeshüu kengaya; mu mia kemezhiekecü ki puo nei kebau siazha ngu motalie lho.

⁶Mia tsunuokoe ketsamia tsüla zo, mu u krünuokoe unuonuo thetshe zo.

⁷Die kevi kepue kenyamia vazhü mo, kemeda kepue süki rei kezhamia[23] vazhü mokuo.

⁸Theso khashüyakezhau mhingu ki we theso sü puo la ketsie theguo mhie zo, kehourapuorei süko mhachü khrielieya.

⁹Puokrukemomia puo kejo vakeshü nunu khrietho pelhoulieya, derei kegei keletsa seketuomia u khrietho chü khowaya.

¹⁰Mhakesimiae va puo kerhiekeshü nu zo rei, mhasikemomia va krie puo vü pethakeshü ki rei mhale pesou kuolieya.

¹¹Kesuomiae kegeikecü rübei pfhütuoya, süla puozho kesuo dieliemia ketsepie puo petsoutuo.

¹²Puo nuo rüguseketa thega krüpfü ze kesekecü we mhasikemomia puo kenya mhatho chüba di ze kesekecü ki vikuo.

¹³Kesuoe kesuo pie kevi pu chükeshüu ki nunu zorei lamvütaya.

¹⁴Kegeikecü pesiekecü ha dzü phakeshü mhie zo, süla sedeketa mhodzü khawa morosuo.

¹⁵Kerüzhümia mezhü, mu kemiathomia pejoketa, hanie kenienie rei Jihovae rütseya.

¹⁶Mhasi khrüketuo la mhasikemomia dzie nu puoma kikecü puo batuo mu, puo noule-e sünu ba mo zocü la.

¹⁷Khriethomia puoe puotei pete nu khrieya, mu mha kere kekhoyaketuo la siezedzüriemia lhousierya.

¹⁸Pemo puo zanuomia pie pfüshütuoü puo die phrakeshümia mhale tsei mo.

¹⁹Kephouma puo neiyakezhamia kegeikecü puo neiya; themia puo care chü kerükriekezhamia kepeka meshülieya.

²⁰Themia puo nou kerüpfhimia vi kehielieya mo, mu puo tie keremia kemezhiekecü nu tetsutaya.

²¹Mhale kemo nuou puo puo bu puo nousuo baya, mu nuo mhasi kemo puo sü puo kenei baya mo.

²²Thenou mvü kebae daru kevi puo, derei u dzü kezei-e uruko chü pesowaya.

²³Kelhiecümiae pekhre theso pielie di ketho cau bie kerüpfhiwaya.

²⁴Mhacamhala kelemia puo zie kereipie mhasi meholieya, derei mhasikemomia mhi-e kijü thela nu votaya.

²⁵Nuo mhasikemo-u puo puo bu puo nou kemezhietaya, mu puo penuokeshüpfü bu puo dzüzeitaya.

²⁶Kemiathomia kemvü chü di u bu siazha kechü vi mo, therhu kepfümia rei pechüpenyükecüe kekrü.

²⁷Puo dieko kethelieyakezhau mhakesimia mu kemenuomiae mhacamhala silieyakezhamia zo.

²⁸Mhasikemomia zorei kemekrie ba ro, puoü mhakesimia ütaya, mu puotie kethe se bakelie ki, puoü mecie ütatuo.