Read Angami Naga Mhasidie 18 Bible Online

Mhasidie 18 - Angami Naga bible

Mhasidie 18

¹Miarei nu tuokemomia puo menguko pfhüketa ki, mha puotoukecü pete petsoutaya.

²Mhalekemomia mhacamhala silieketuo puo neiya mo, derei puo thuo puo keleu we pu zo ba nyüya.

³Mha kesuou kevor ki, mha krenyükecü rei vorya; mu therhu pejükewa ki thenga sa vorya.

⁴Themia tie nu diekoe dzübe kesouko mhie, mhasi dzüluoue rücü krukezhü kemhie zo.

⁵Kerüzhümia yapieketae kekrü, morei kemiathomia mezhü khakewa vi mo.

⁶Mhasikemomia tie-e kegei se vorya, mu puo me-e kevükecü meshülieya.

⁷Mhalekemomia me-e puo kepekau zo, mu kebie mhie puo thuo puo tie lanu puo mapfülieya.

⁸Sieü kechümia diekoe kecüca cü kevi mhietaya; sükoe u nou kesoutho nu tsuya.

⁹Mhachü kemecüue kepeka ze siezedzürie zo.

¹⁰Jihova zae dahou kemetei puo zo, kemiathomia ta sünu vo di u yalieya.

¹¹Kenyimia kinyi-e puo la nadi kemeteiu, mu dahou kerükrie puo mhie di puo ya se balieya.

¹²Kepeka kevor mhodzü themia meloue kemiako rieya, mu therhu mhodzü u melou rünuoshüya.

¹³Mia puoe mia die rünyükelie mhodzü mia die kelata ro, süue mhasi kemo mu thenga puo zo.

¹⁴Themia u ruopfü shürheiu la kethachükemezie hielieya, derei u ruopfü shürheiu jüta ro supuonie hielie vi ta?

¹⁵Kemeciemia noue mhasi ngulieya, mu mhakesimia nyie-e mhasimhale pfhüya.

¹⁶Mha methuo pie mia ketsüu puo la cha khrülieya, mu puo ze vor kezhamia mhodzü shüya.

¹⁷Mia puo thuo puo dze pushülie kerieu mezhükecü mhieya, kekreiu vor puo dze pushü kemochie.

¹⁸Dape di pepikeshüe keprülikecü pejüwaya, mu kebvü keba kekuonie chükho kekreishüya.

¹⁹U siezemia nei kemo chükewae nadi puo kirei lielierekuotaya, tsiu unie keprülikecüe kediki puo nu thegiro cakha kemhie unie donu bataya.

²⁰Mia puoe puo me nu die la puo va tshulietuo; puo tienu kepar süu se puo kelhuo chülietuo.

²¹Kesia mu kerhei-e u meü kekuou gei ba, mu süu u neiyakezhamia süu siko riecütuo.

²²Puo kimia ngukelieu mha kevi puo nguliete, mu Jihova khrie pfülieya.

²³Kejümiae mia ki u mezhiemeloya, derei kenyimiae sokotaya.

²⁴Mia huo u zemia gei khrietho meviva tuoya, derei khrietho kethoe siezedzürie ki rei kepenuokuo.