Read Angami Naga Mhasidie 19 Bible Online

Mhasidie 19 - Angami Naga bible

Mhasidie 19

¹Mhajü zorei diethoketuoue themia puo tie re mu mhalekemo-u ki vikuo.

²Themia shürhei phi tuo rei mhasimhale sa mokecüe vi mo, mu puo phicha rhürhükezhamia cha vajowaya.

³Puoe kerhanyakecü geinu cha nu kepeka vorya, derei puo noue Jihova pejotaya.

⁴Kinyi geinu khrietho kekra ze vorshüya, derei kejümia-e puo khrietho jüya.

⁵Ketijü zhapu kechümia siazha ngu motalie lho, mu kemeda kepumia rei süu therhielie kenjü.

⁶Themia kekra rei kezhamia nei chüketuo pfhüya, mu kehoupuorei mha methuo khapie u ketsüu ze khrietho chülieya.

⁷Kejümia puo siezedzürie pete puo mecütaya; siüliro puo zemia we kidepuo ze kepecietatuo ga? Puo diepu uko whuo voya, derei uko puo khawaya.

⁸Mhasi ngukeliemia puo thuo puo kelhou khrieya; mu mhakelemia vi kehielietuo.

⁹Ketijü zhapu kechümia siazha ngu motalie lho, mu kemeda kepumia katatuo.

¹⁰Kemelomiae lhou u theguo chükecü ze kevazhü mo, süki rei kituomia bu kedimia nuonuo kekhakecü we suokuo.

¹¹Kesikele u gei ketuomia-e u nou meyie mhataya mo, mu puo kevi-e mia puo gei mha kesuo chüshü zorei ngu kemo mhiewaya.

¹²Kediu nouyie-e Losha kemeho tuoi, derei puo neiketae nha gei thezei kezhü mhie zo.

¹³Nuo kemeloyoe puo puo kepekau zo, mu mia prüli sei bayakezha kimiapfüe teirü po sei keba mhie zo.

¹⁴Ki mu kinyi-e u puonuo kinu kevor kayie, derei mia nupfünuo kevipfüe Jihova kinu vor zo.

¹⁵Mhachü kemecüe keze kesou nu bataya, mu kemecüu merü di kemezhietatuo.

¹⁶Die khakeshüko se bakeliemia puo kerheiro se balieya; derei dieu rütseyakezhau siatatuo.

¹⁷Kejümia ngumezhieyakezhau mha pie Jihova thepuya, mu puoe puo mhatho sou ngu tsei latuo.

¹⁸Kemerü baluokecü nu n nuo pethaliecie; puo chüzhü zorei pethakecü khawa hiecie.

¹⁹Nouyie keremia siazha ngu di kemezhietuo; no puo kelashü üliro, puo süu pfü laya.

²⁰Tarhokeshü die rünyülie mu kepetha die lieliecie, hasie n bu mhasi ngulieketuo la.

²¹Themia noue mha kekra rhü baya, sishierei Jihova mharhüu rübei thakelie zotuo.

²²Mia pete geinu mengukecüu sü dietho zo thakelieu, mu kejüe kemeda ki vikuo.

²³Jihova khrü keprei-e kerhei tsatie volieya; süu ngukeliemia khrukhretatuo; mha kesuo puo gei vorlie lho.

²⁴Kemecümiae puo dzie pie puo khou nu khrupie baya, se kho puo me rei va mo baya.

²⁵Mha krenyüyakezhau vüshücie, sitse kemomia mha kevi silietuo; kesikelemia kerhieshücie, sitse puo mhasi salietuo.

²⁶U puonuo pesekezhau, mu puo zuo whuokewaue thenga krashüya mu thetha se vorya.

²⁷A nuo, kepethadie kerünyü nunu rüyota hiecie, no mhasimhale dieko ze kepecietatuo.

²⁸Ketijü zhapu kechüue ketho-u kretaya, mu kerüzhümia me mha kesuo mezulieya.

²⁹Mha krenyüyakezhako pejoketuo, mu mhasikemomia chie vüketuo la seiro kesepie bate.