Read Angami Naga Mhasidie 2 Bible Online

Mhasidie 2 - Angami Naga bible

Mhasidie 2

¹A nuo, mhanuü noe a dieko lielie, mu a diekhakeshüko n nounu kengu setuolie üro;

²N nyie kedeipie mhasi rünyülie, tsiu n melou pie mhacamhala silieketuotsa shüliecie;

³Ketho zo, mhasimhale mengu di kra zolie, mu puocapuola silieketuo la chashülie,

⁴No rakachü kepfhü tuoi puo pfhü volie, mu keviepie kezhü kinyiko kepfhü tuoi puo pfhü volie üro;

⁵Sitse noe Jihova khrüprei silietuo, sidi Ukepenuopfü mhasi silietuo.

⁶Kekreilamonyü Jihovae mhasi khashüya; Puo tie nunu kesikele tsiu puocapuola sikelie parya.

⁷Puoe kemezhümia la mhasi puocüu kengupie ba; puoe kemezhümia la pezhü zo.

⁸Ketho chako rüguo se baya, mu puo kepeleko cha pekru se tuoya.

⁹Sitse noe kemiatho mu kedietho dze, tsiu kemezhü mu mha kevi cha pete silietuo;

¹⁰Mhasi n melou nu lelietuo, mu mhasi-e n phou la vituo;

¹¹kemenuoe n rüguo balietuo; mu kesikele thuo n rüguolietuo;

¹²Süu kesuo chau nunu n yalietuo, die kerüpfhi kepuko ki nunu n kelalieketuo la.

¹³Kemezhü chau khawa di, kezei nu tuotatuo üketako kinu,

¹⁴Mha kesuo kechü u nei, mu kerüpfhi zho u neiyakezhako kinu;

¹⁵uko chae rüwirüge, mu ukoe cha nu rütsi.

¹⁶Thenu kerüzhüu dzie nunu, puo die vi sekecü pieüpfü ki nunu n kelalieketuo la.

¹⁷Puo rüü ki ze kelhouu khakewa mu pfhekho dieu rükra moketapfü ki nu;

¹⁸Puo rüli[2] kesiatsa vate, mu puo chako mhakhrütsa vaya.

¹⁹Süpfü ki kevoko miapuorei lalieya mo, morei süko kerhei chau va lalieya mo.

²⁰Süla kevimia cha nu tuolie, mu kemiathomia chako nu.

²¹Kekreilamonyü kemezhümia kijü nu lhoulietuo mu kejokejümia sünu balieya.

²²Derei kelhiecümia we kijü nunu kelhiwatuo, mu mia peseyakezhamia sünu nu puo phewatuo.