Read Angami Naga Mhasidie 20 Bible Online

Mhasidie 20 - Angami Naga bible

Mhasidie 20

¹Zue mha krekezhau, zu kekuoe kegeikecüu; mu süu bu u ketsikewamia mhasikemomia zo.

²Kediu nouyie-e losha meho keba mhie; themia kehoupuorei puo nou chü kemeyieshüyakezhau puo kelhou pejüwatuo.

³Kegei nunu kethekelie-e therhu; derei mhasi kemo khe kegei ba zotuo.

⁴Mhachü kemecüu puotei ki lie cielie lho; puo lieyie teiki mhapfhütuo mu puorei ngulie lho.

⁵Themia mharhüe dzü kesou mhie zo, derei kemeciemia süu teshü se parlieya.

⁶Themia pete dietho zo ketha pu phreya; derei supuonie pelekesümia ngulie vi ta?

⁷Kemiathomia kedietho cha nu tuoya, süu kemedzimia nuonuoko theja ngulieya.

⁸Kedimia capi ba gei bayakezhaue puo mhi üse mha kesuo pete whuowaya.

⁹Supuonie “A melou chü kemesalie ta; a kephouma nunu mesate” sikecü pulie vi ta?

¹⁰Mha se ketou kemo mu mha kemejü kekreikecü, Jihova mhodzü ki kerütse zo.

¹¹Nhicumia zorei puo mhatho geinu puo silieya, puo mhatho mesa mu puotou momo shicü.

¹²Sikelie nyie mu ngukelie mhi, kenienie rei Jihovae sünie kenienie rei chüshü.

¹³Keze u nei hie, mhajüta molieketuo la, mhirhoshülie, sitse no kecüca kekra ngulietuo.

¹⁴Mha kekhrüue sie, “Hau vi mo, hau vi mo,” ituoya, derei tuovüta tse, puo kemelha tuotaya.

¹⁵Suna mu ketsie puoma kere kekra ba; derei kesikele tie-e ketsie puoma kerepfü zo.

¹⁶Sikemomia puo zhapu chükeshüu pfhe pielie, puo die khakeshü zhapuko la puo pfhe pietalie.

¹⁷Mia kese nunu ngukelie niakhrüda mouya, derei kenuotsa puo me nu tsiesenuo thuo tshupfütatuo.

¹⁸Mharhü pete rei ketahiketarhokecü geinu pesielieya; chatha kevi se di terhü chülie.

¹⁹Sieüsielumia mha kepekhreko hielashüya; süla mia kese die puketuomia ze kepekro hiecie,

²⁰N puo n zuo rüseya liro n mitubou zeiboui di mhetatuo.

²¹Therie ki kiülie ngu mhaikelieu; thela nu theja ngulie lho.

²²“A mha kesuou mese chüshütuo” idi pu hiecie; derei Jihova pfhe balie, sitse puo n khruohishütuo.

²³Kemejü tsie kekrücüu Jihovae rütseya; mu mhakemejü kekrücü vi mo.

²⁴U phichako pete Jihova gei ba, we kiki di u cha silie ta?

²⁵Mia puoe meyhumehe di sie, “Süue mesa” idi pushü, mu puo phrakeshüu meho menuo lashü ro süu puo la kebie puotaya.

²⁶Mhakesi kediue kerüzhümia whuowaya, mu uko mho geinu gari thuo-u peta votaya.

²⁷Themia ruopfüe Jihova mitu zo, süue u nou kesouthoko rei pfhüya.

²⁸Dietho zo kethau mu kemiatho-u kedimia pekru se balieya, mu kemiatho-e[24] puo kedibau se balieya.

²⁹Khriesamia zayieu sü kemeca kemekhro-u, derei ketsako zieviue u tsütha kerüpouu zo.

³⁰Vü kerüzakeshüe mha kesuo khrü kemesawaya; u vükeshüe u nou kesoutho pete chü kemesawaya.