Read Angami Naga Mhasidie 21 Bible Online

Mhasidie 21 - Angami Naga bible

Mhasidie 21

¹Kediu meloue Jihova dzie nu ba; puoe süu dzükru mhie kewhipie puo medotsa volie vi.

²Themia kehoupuorei puo thuo puo mhi ki we puo chako üse mezhü üya derei Jihovae u melou mejüya.

³Jihova mhodzü ki we miatho dietho mu mha puotou di chükeshüu ruosuo ki vikuo.

⁴Kemiavikecü mhi mu kemiakokecü melou, siro kerüzhüko mitu hako pete kephouma zo.

⁵Mharhü menuokelie mha kekra u vie chülieya, derei kehoupuorei meyhuwa ro tsopfhütaya.

⁶Kemeda meü se kishükinyi ngukelie-e mhoutsa hepfüketa mu kesiabie[25] nu leketa zo.

⁷Kerüzhümia u mhatho kesuoko thuo u pekawatuo, kekreilamonyü uko mha puotoukecüu chü mvüketa la.

⁸Kejokecümia chae rüwirüge zo, derei kemesamia mhatho-e mezhü.

⁹Thenu puotie kerepfü puo ze kidi nu kelhou kirei ki peso nu puokeyo nu kebau we vikuo.

¹⁰Kelhiecümia noue mha kesuo menguya; puo siezanuomia puo geinu ngukemezhie ngulieya mo.

¹¹Mha krenyüyakezhamia siazha ngukelie ki, kemomia rei mhasilieya; mhakesimia pethakeshü ki, puo mhasimhale ngu salieya.

¹²Kemiathomiae kerüzhümia kiu dze le baya; derei Kepenuopfüe kerüzhümia kelhou pie kepeka nu shüwatuo.

¹³Themia kehoupuorei mhakejümia ujaunga rükhruokeshü rünyü mvü di u nyie kegukeliemia, puo thuo zorei kekra tei ngukelie nhie, mia puo pfhe rünyü lho.

¹⁴Kepekhre nu mhapie mia tsükeshüe nouyie bie kediwaya, theso keviepie mia tsükeshü nunu noupfhü therhielieya.

¹⁵Mha puotouu chükeshü ki, kemiathomia süu ngu u nei baya, derei mha kesuo chüyakezhako gei we nousuo vortuo.

¹⁶Themia mhasimhale chau vaciepfü praketamia kesiamia kehou nu batatuo.

¹⁷Lhou u theguo chü nyüyakezhamia kejümia chütatuo; zu mu tier u neikezhamia mhanyilie lho.

¹⁸Kerüzhümia mha kesuo pie kemiathomia gei shütuoü kebau u thuo süu dzüpfülietaya.

¹⁹Thenu rhodzürhopre mu panyapara sei kebapfü puo ze lhou keba ki vo rayha nu lhou kebau we vikuo.

²⁰Mhama kere kinyi-e mhakesimia dzienu baya, derei mhasikemomia süu ketsiwaya.

²¹Kemiatho mu ngukemezhie whuotuoyakezhamia kerhei[26] mu therhu ngulietuo.

²²Mhakesimia-e nadi kuo kebau meli sie di mia süu pele kebako zorei penyüwaya.

²³Themia puome puotie kekhakeliemia, kemezhiekecü nunu puo thuo puo kelalieya.

²⁴Kemiako kemelha tuoyakezhamia za üse “Mha krenyüyakezhamia” iya.

²⁵Kemecümia menguue puo dukhriwaya, kekreilamonyü puo dzie-e mhachü mvüyakezha la.

²⁶Kerüzhümiae zhate mha mehou baya, derei kemiathomia mha khashüya mu khase bataya mo.

²⁷Kerüzhümia ruosuoe kerütse zo, süki rei mha kesuo kele nunu se kevor we kedipfü kerütsekuotuo shi!

²⁸Ketijü zhapue jütatuo, derei mia die süu rünyükelieu pu sei tuotaya.

²⁹Kelhiecümia thepfukecü zie pekieya, derei kemezhümia we puo chako le menuoya.

³⁰Mhasi, mhacamhala sikelie, morei kepetha die hako nu Jihova petsoukecü baya mo.

³¹Terhü kegeiketuo nhie la gura kese se thaya, derei kuokelie Jihova vie.