Read Angami Naga Mhasidie 24 Bible Online

Mhasidie 24 - Angami Naga bible

Mhasidie 24

¹Kelhiecümia ngu n ro hie, morei süko ze kepekroketuo rei mengu hie;

²Kekreilamonyü uko noue mha kepeka dze leya, mu uko tie-e mha kesuo kechü dze kepu tuoya.

³Mhasi se ki chülieya, mu kesikele geinu süu sedeshü;

⁴Mhasi geinu mhama kere mu u kenei kinyiko se vor kiko tshulie.

⁵Mhakesikelemiae kekuo mia ki kuokuo, mu mhakesimiae kuomiemielieya.

⁶Ketahiketarhokecü chatha se di no terhü chütuo, mu ketarho kekra kenyira kuolieya.

⁷Mhasikemomia la mhasi-e rükriethor; kharu ki mechü hou nu uko diepu motaya.

⁸Mha kesuo rhüyakezhau üse kelhiekezhau üdi kietuo.

⁹Mhasikemomia kelekoe kephouma zo, mu mha krenyüyakezhau mia mhodzü ki kerütse zo.

¹⁰No tsopfhükelie nhie n cha mezhieta liro, n kekuo keduonuoyo puo zo.

¹¹Mia pesiawatuoü teze voketa ki mu mia dukhriwatuoü dojü se ketha ki, uko kelaliecie.

¹²Noe sie, “Harie, hie süu si mo,” ita liro, thenou mehoyakezhaue süu si lhoü me? N ruopfü se kebaue süu nguta lho me? Puo mhatho kheki zhakhra chüshü lhoü me?

¹³A nuo, mepfhidzü cücie, süu vicü la, mu puodzü zu kepar cükecü n me nu mou.

¹⁴Mhasi rei n ruopfü la sümhiekecü siliecie; no süu ngulie ro, n siedze puo bate, mu n kemerüu jütalie lho.

¹⁵Kerüzhümia mhie di kemiathomia petsou di, ta kemiathomia kebachü vatuoüta hie.

¹⁶Kekreilamonyü uko va thenie tetsuta zo rei la sielietuo; derei mha keka bu kerüzhümia penyüwaya.

¹⁷N ngumvümia tetsuketa ki n neita hiecie, mu puo phi mesükelie ki n nou bu puo neita hie;

¹⁸Jihovae süu ngushü di puo nei mota rei silie lhomu; tsiu puo nouyieu puo geinu kedi setatuo.

¹⁹Kesuomia la rünou mo hie; mu kelhiecümia mehou hie.

²⁰Kekreilamonyü kesuomia siedze jü; kerüzhümia mitu mhetatuo.

²¹A nuo, Jihova mu kediu preiliecie, unie mia puo die rei ze mota hie;[30]

²²Kepeka unie kinu mhai sierya, mu supuonie kepeka süu kevor silie vituo ga?

²³Hako rei mhakesimia pukeshü die: Thecathepi kechü nu u nei si kreiketae vi mo.

²⁴Kehoupuorei kerüzhüu ki, “Noe mezhü zo” ita ro, themiako puo rüsetatuo, seyieko puo mecütatuo;

²⁵derei kerüzhümia kerhiekeshümia u kenei ngulietuo, mu theja kevi uko gei votuo.

²⁶Mia die kela toukeshüe puo mebokeshü puo.

²⁷Chazou n mhatho keselie, n lie nu mha pete dojü tseilie, süsie nu n ki chüliecie.

²⁸Puocapuola kejü nu n zanuomia kepetsou zhapu khashü hie, mu n tie pie puo se kedo hie.

²⁹“Puo a gei chükeshü tuoi a puo gei chü lashütuo, Puo a gei chükeshü mhie di puo zhadavü lashütuo,” ita hie.

³⁰Ae mha chükemecüu lie pfüthe vo, kerhanyakecüu khubelie khie ki vo;

³¹mu harie, süu zohuko thuo lhou tshupfü zhü, zozie thuo kijü pete zepfü zhüta; mu tsiepfhekroko me tsuzhüta.

³²A süu ngukeshü ki mhale menuolie; süu mehoshü di a pethapfülie.

³³“Ze zalielie ba, rüngu zalielie ba, u dzie thepie rülei zalietuo,” ibaya.

³⁴Si ba tse mhakejü kerügumia tuoi, n gei vortuo, mu n tsopfhüu rünyie kesemia mhie di vortuo.