Read Angami Naga Mhasidie 26 Bible Online

Mhasidie 26 - Angami Naga bible

Mhasidie 26

¹Teile ki pekrie krükecü mu lieyie tei ki teirü tuoi, therhue mhasikemomia vazhüya mo.

²Tsiekhrienuo pruo rühouketuo tuoi, kitienuo pruoketuo tuoi, puocapuola kejü rüseue mia gei pfhülie lho.

³Gura la seiro, gada me kekhakecü la kero, mu mhasikemomia chie la seiro seya.

⁴Mhasikemomia khranya ki ze puo die kela hie, no rei puo mhieta rei silie lhomu.

⁵Mhasikemomia khranya ki ze puo die kela lie, mo üro puo thuo puo ü mhasiüta rei silie lhomu.

⁶Mhasikemomia dzie nunu dielie ketsekeshüe puo thuo puo phi dathewa, mu kepeka krieya.

⁷Phiyhomia phi-e ketouya kemo mhiei, mhasikemomia me nu mhasidie rei sümhie zo.

⁸Therhu pie mhasikemomia puo tsükeshüe, tsiedeiro nu ketsie phakewa mhie zo.

⁹Kemezemia puo dzie nu zohu leketa tuoi mhasikemomia me nu mhasidie-e sümhie zo.

¹⁰Mha pete chüshükezha Kepenuopfüe mhasikemomia, mu kejokechümia zha chü phreshüya.

¹¹Tefüe puo thuo merü piekezhü nu la kevo tuoi mhasikemomia-e puo thuo puo khranya nu la votaya.

¹²No themia puo puo mhiki puo thuo puo üse mhasiü tuoyakezha puo ngu me? Mhasikemomia puo we süu ki rei kemerü nyikuo.

¹³Kemecümia-e sie, “Cha nu losha puo tuote! Chaüko nu losha tuote,” ibaya.

¹⁴Kikhae rüge se puo kekheu gei la votayakezha tuoi, kemecümia rei te puo zhü nu tsu lataya.

¹⁵Kemecümiae puo dzie pie puo khou nu sepfü di se puo me nu voketuo rei mecüthor baya.

¹⁶Kemecümia puo thuo puo mhi ki, puo üse mhacamhala si di pulieyakezhamia thenie ki rei mhasikuo übaya.

¹⁷Mia puoe puo nyie puo zha mo zorei, mia kegei keba puo meshüpfükelie-e tefü tuo vokezhü puo nyieto merhashükelie mhie zo.

¹⁸Kenyamia puoe mitsie mu kesia theü ciekeshü tuoi;

¹⁹Puo zanuomia se kedo di sie, “A keyu chü keba zo,” idi pukebamia rei sümhie zo.

²⁰Sei ba mota ro mi mhetaya; mu sieü kechü jüta ro kegeikecü ba sa motaya.

²¹Thezhü pie mizhü ketu nu keshü tuoi mu sei pie mi nu keshü tuoi, meyiemehüketuomia kegeikecü chü petushüya.

²²Sieüsielumia diekoe kecüca cü keviko mhie zo, sükoe u nou kesouthoko nu tsuya.

²³Thenou rhu di diepu keziviketuoe, rakachü dzü pie rünyoli thepie keba mhie zo.

²⁴Mia ngumecüyakezhamiae puo tie se kethera, mu puo noue mha sekedokecü thuo tshu baya;

²⁵Puo die kezivi pu zorei puo pele hiecie, kekreilamonyü puo noue mha kerütsekecü thenie bakecü la;

²⁶Puo mia ngukemecüu kethedo di kevie se tha rei, mechü kehou nunu puo kerüzhü hielashütuo.

²⁷Kheho thiekezhamia puo thuo te sünu tsutuo, ketsie ketoukeshümia süu rütou la puo ki votuo.

²⁸Kemeda meüe puo thuo biekerüzakeshümia ngumecüya, mu mia sekedokecü tie-e kepeka mhatho chüya.