Read Angami Naga Mhasidie 28 Bible Online

Mhasidie 28 - Angami Naga bible

Mhasidie 28

¹Miapuorei u whuotuo morei kerüzhümiae ta tuoya, derei kemiathomiae losha tuoi thepfu thaya.

²Krüta kekra bata liro kijüu kephouma chü bataya; derei mhasimhale kenyimia ba ro süu khrukhre di ba pechalieya.

³Kekuokesemia[33] thuo kejümia pesekecüe teirü phi di kecüca peka lotsokewa mhie zo.

⁴Thezho medziyakemomia kerüzhümia tshetuoya, derei thezho-u se bayakezhamia süko ze keperhieya.

⁵Themia kesuokoe kethocau silieya mo, derei Jihova pfhüyakezhamiae mha pete silieya.

⁶Mhajü rei kemiatho cha nu ketuomia we kenyimia chü di dietho mo ketuou ki vikuo.

⁷Thezho-u se bakeliemia sü kesimia nuonuo zo, derei kecahuokecümia ze kepekroyakezhamia puo puo bu mengalieya.

⁸Puoprapuoshü geinu mevipie puo kinyi chü pekralieyakezhaue kejümia ngumezhieyakezhamia puo la kengupie keba zo.

⁹Thezho-u rünyü mvü di puo nyie kerei seketamia puo kecha zorei kerütsetaya.

¹⁰Kemezhümia ketsipie kesuo cha nu shüyakezhau puo thuo puo kheho nu tetsutuo, derei kejokejümia mha kevi welietuo.

¹¹Kenyimia puo mhi ki puo thuo puoü mhasi übaya, derei mhacamhala siyakezha mhakejüue kenyiu pfhü se parshüya.

¹²Kemiathomia kuokelie ki, u neithor baya; derei kerüzhümia kuo sierta tse, themiako u thuo u kevietaya.

¹³Puo kephouma whe seketuomia vi kehielie lho, derei süko phrawa mu khawaketamia ngukemezhie ngulietuo.

¹⁴Kemichie jü di tuoyakezhamia theja kepfümia zo, derei puo nou keremia mha kere nu tetsutuo.

¹⁵Kerüzhümia kejümia mho dikecüe losha kemeho mu thega mia whuo kevo tuoi zo.

¹⁶Mhasimhale kejü kezhaue puo zhosuo di mia peseya; derei mha dietho kemo ngu mecüyakezhamia puo teisozhako chü pechalietuo.

¹⁷Mia puoe mia zie pupie pfüta ro, puo se ketso puo bu kitamia chütacie; miapuorei bu puo khruohi hie.

¹⁸Lhou mezhü tuoyakezhamia kelalietuo, derei puo chako kekrükecümia te Thekhe nu tsutatuo.

¹⁹Lie ciekeliemia kecüca kekra batuo, derei kemethuo puo sie whuoketuomia mhajü pfütatuo.

²⁰Kemiathomia theja kekra ngulietuo, derei mhanyi mhailie nyü kebamia siazha ngu motalie lho.

²¹U nei si kreikecü vi mo, Kekreilamonyü niekhrüda yopuo la themia kekrütaya.

²²Kemeteimiae mhanyi mhailie nyü tuoya, mu ketsopfhü puo gei vorketuo siya mo.

²³Mia kerhieshüyakezhau we kethera di puotie pie mia tshetuoyakezhau kirei kenuotsa mia nei pfükuotuo.

²⁴Puo puo morei puo zuo vie rügulie di, “Süu kephouma mo” isikezhau, mha pekayakezha dzieseu zo.

²⁵Mha mehoukezhamiae kegei pesieshüya, derei Jihova peleyakezhamia ro chü penyishütuo.

²⁶Puo thuo puo peleyakezhamia kenyamia zo, derei mhasi cha nu tuoyakezhamia kelalietuo.

²⁷Mhapie kejümia tsüyakezhamia tsopfhütalie lho, derei puo mhi kerei seketamia rüse pfütuo.

²⁸Kerüzhümia kuo kesier ki, themia rüshütaya, derei uko kaketa ki, kemiathomia kra parlieya.