Read Angami Naga Mhasidie 3 Bible Online

Mhasidie 3 - Angami Naga bible

Mhasidie 3

¹A nuo, a kepetha rükra mota hie, sikecüumonyü a die khakeshüko bu n melou nu balie,

²sitse teisozha mu teicie kekra, siro ketshukelhuo n gei vortuo.

³Diethokecü mu ketho bu n khawa hie; sünie pie n vo nu phapfülie; sünie pie n melou nu thulie.

⁴Sitse no Ukepenuopfü mu themia mhodzünu pelelie kesü chülietuo.

⁵N melou pete se Jihova pelelie; tsiu n thuo n mhasi peleta hie.

⁶N cha pete nu puo sanyülie, sitse puo n chako chü kemezhüshütuo.

⁷N mhi ki n thuo n üse mhasi üta hie; Jihova preilie mu kesuou therhielie.

⁸Süue n mo keshürho mu n phou chü keshürheishütuo.

⁹N keba peteu se Jihova rhulie, mu n mhatho si kerieko pete se.

¹⁰Sitse n lhaki tshulietuo, mu n khubezu se n liki tshumezü balietuo.

¹¹A nuo, Jihovae n pethakecü mecüta hie; morei puo n ruokeshü n nyieta hie;

¹²Jihovae puo khriemia petha kemezhüshüya, miapuonuoe puo nuo khrieu pethayakecü tuoi.

¹³Mhasi ngukeliemia mhacamhala lelieyakezhamia kenei theja ngulieya.

¹⁴Süpfü mhapfhüe rakachü kirei vikuo, mu puo se kelerko suna kirei vikuocü la.

¹⁵Süpfüe cümenyie kirei rekuo; mu no mengukezha pete pie süpfü ze kemejükeliepfü mo.

¹⁶Puo dzie puo zatsa rhei kecha ba, mu puo vitsa liro kinyi mu therhu ba.

¹⁷Puo chaüko sü thenou kemvü, mu nouneü puo chatseko chü phre.

¹⁸Puo thezekeliemia kerhei seibo puo chülieya; mu puo gei bakeliemia u neisiei baya.

¹⁹Jihovae puo mhasi se kijü chüshü; puo kesikele geinu teiko chülie;

²⁰Puo mhasi üse kesouko nu dzü bu rüluo parlie, mu kimhoukoe thezei pekhrüshü.

²¹A nuo, hako bu n mhi therhieta hie, mhasimhale kevi mu kemenuo se zolie.

²²Sitse sükoe n ruopfü la kerhei chülietuo mu n vo gei rütso puo chülietuo.

²³Sitse no n cha nu khrukhre di tuolietuo, mu n phi mesülie lho.

²⁴No batsu[3] rei michietalie lho; no rühi tsu zhü rei ze tshüilietuo.

²⁵Kemichie mhai kevor prei hie, morei tei rükrierükhrie vor kelhiecümia va rei;

²⁶kekreilamonyü Jihova sü n kethepfu-ucü la, mu n phi bu tetsutalie lho.

²⁷Kevi pie ngulie kezhümia ketsü khawa hie,[4] n dzie nu süu chülie kevi kekuo keba ki.

²⁸No chülie vi ba üro n zanuo-u ki, “Vo di, sodu nu vorlie, sodu nu khashütuo” isi kecü pu hie.

²⁹N zanuomia gei mha kesuo rhü hie; puo n pele di n khie ki keba la.

³⁰Mia n gei mha kesuo puorei chü mo liro puocapuola jü di mia ze kegei hiecie.

³¹Mia kemvükechüko ngu n rota hie, mu puo zho puorei lie hie.

³²Kekreilamonyü Jihova mhodzü ki kerüpfhimia sü kerütsekecü la, derei kemezhümia gei puo kethepfu baya.

³³Jihova rüse-e kelhiecümia gei baya, derei puoe japie kemiathomia kebachü nu shüya.

³⁴Puoe mia krenyüyakezhamia kre baya, derei ngukemezhie pie thenou kerünuoko tsüya.

³⁵Mhakesimia therhu welietuo, derei kerhanya kecümia thenga seüdzütuo.