Read Angami Naga Mhasidie 31 Bible Online

Mhasidie 31 - Angami Naga bible

Mhasidie 31

¹Kediu Lemuel die. Puo zuo puo pethakeshü siedzekesi die:

²Harie a nuo, ki-a? A nouprau ki-a? A die phrakeshü nuou, ki-a?

³N kekuo pie thenumia geishü hie, n zhoko pie kediko pekawayakezhako geishü hie.

⁴Harie Lemuel, haha kediko la mo ho, zu kriekecü kediko la mo, morei zu kekuo kriekecü kedimia nuonuoko la mo;

⁵uko zu krielie di thezho-u rükra mota ro, kemezhie kebamia mezhüko chü kediwa rei silie lhomu.

⁶Zu kekuo pie katatuoü kebako tsüshücie, mu zu pie u nou kemezhiethor kebamia tsüshücie.

⁷Uko bu krielie di u tsopfhü rükra mo, mu u mezhieko rükra sa motalie.

⁸N tie mekuopie die pulie kelhomia, u kekhruohi tuokemoko mezhüu pulie.

⁹N tie mekuopie mezhü tou di capi chülie, kejümia mu ketsopfhümia zhapu chüshülie.

¹⁰Supuonie thenukevipfü puo ngulie vi ta? Puoe rubiko kirei puoma rekuo.

¹¹Puo nupfu noue puo pele tsapfü baya, mu puoe mha kevi puorei tsopfhütalie lho.

¹²Hapfüe puo kerheichie puo nupfu gei mha kevi chütuo mu mha kesuo chüshülie lho.

¹³Puoe nhachümie mu flaxzhüpfü pfhülieya, mu puo neisiei di puo dzienie pie mhachülieya.

¹⁴Puoe lhithomia rouko kemhie zo, puoe kepetse nunu puo kecüca se vorlieya.

¹⁵Puoe teiso kemo nu sielie di kecüca chüpie puo kinuko tsüya, mu mhatho pie puo kituopfüko tsülieya.

¹⁶Puoe kiülie dze le di, süu khrülieya, puo dzie pie chü di khubelie cielieya.

¹⁷Puoe kekuo pie puo chie phalieya, mu puo bou chü kemeteilieya.

¹⁸Hapfüe puo lhi mevilie vi ücü siya, teizei gei puo mitu mhetaya mo.

¹⁹Hapfüe puo dzie pie tshanyoseiu gei shülieya, mu puo dzie pie dziecie seiu thezelieya.

²⁰Hapfüe puo dzie chapie kejümia gei shüya, mu puo dzie chapie kemenga kebako tsoshüya.

²¹Pekrie krü keler ki hapfüe puo kikru la michie baya mo, kekreilamonyü puo kinuko pete pfhe meriemegekecü dzie phre batayacü la.

²²Hapfüe puo thuo mha kewhepfheko chülieya; puo pfhe-e pfhe kememhiepfü mu teimeziekecüpfü se chüya.

²³Kharu nu mia puo nupfu siya, puo rüna nu phichüko donu baya.

²⁴Puoe linenpfhe kememhiepfü se pfhenei chülie di süu zelieya; terha pie lhithomia ki ze shüya.

²⁵Puo kekuo mu therhu sa pie puo pfhenei chü; mu hasietsa hapfüe puo neituo.

²⁶Hapfüe puotie tiega sie di mhasi puya, mu puo meü nu zhovi zho pethakecü tuo.

²⁷Hapfüe puo kikru dze le menuoya, mu mhachü kemecü niakhrüda cüya mo.

²⁸Puo nuonuokoe puo kie u neisieiya; puo nupfu rei sa, mu puo tshe di:

²⁹“Thenumia kekra rei mhachü pevi phishü, derei no we süko pete ki vikuo” iya.

³⁰Mia nei chükecüe mia seketsilieya, mu zivi-e kemethuo zo, derei thenu Jihova khrüpreiyakezhapfü mia puo tshe zhü.

³¹Puo dzie mhatho siko pie puo tsücie, mu puo mhathoko bu kharuko nu puo tsheshücie.