Read Angami Naga Mhasidie 4 Bible Online

Mhasidie 4 - Angami Naga bible

Mhasidie 4

¹Rünyülie, nhicuko, nie puonuo kepetha die, mu puocapuola kesou silietuoü rü terüliecie

²Kekreilamonyü a kepethadie kevi khashüya, a kepetha die lie mvüta hiecie.

³A a puo nuou chü keba ki, mene, mu a zuo nuo khrieu chü vorcü ki,

⁴puo a petha di pukecü, “A dieko khapie n nou batsaliecie; a diekhakeshüko chüüze di lhoulie.

⁵Mhasi pfhüliecie; mha le pesoukelie pfhülie: rükra mota hie, morei a tie nunu kepar dieko therhieta hie.

⁶Puo khawa hie, sitse süpfüe n pekru se balietuo; Puo khrielie, sitse puo n rüguolietuo.

⁷Mhasi bode sü hau: Mhasi pfhükelieu zo, No mha kekrei huo ngu salie rei, si pesoukelie pfhüliecie.

⁸Puo se kemeyie secie, sitse süpfüe n chü pezhashütuo. puo ciepielie, puo n bu therhu pfülietuo.

⁹Puo rütso nyie kezivi puo khapie n tsü gei shütuo; Puoe thetshetherhu keditsüre puo pie n tsütuo.”

¹⁰Rünyüliecie, a nuo, sidi a dieko lieliecie, sidi a puyakezhako lieliecie; sitse no rhei chalietuo.

¹¹A mhasi cha n pethashüte; a cha kemezhüko nu n chatha voshüte.

¹²N kevora, n phichako chakha chülie lho; tsiu no tashü zorei, n phi meshülie lho.

¹³Kepetha die thezetsa se balie; puo bu tuota hie; puo se balie; süu n kerheiro zocü la.

¹⁴Kelhiecüko cha nu tuo hie, tsiu themia kesuokechümia cha nu vo hie.

¹⁵Süu therhielie; sünu vo hie; süu nunu rüreitalie; sidi tuotalie.

¹⁶Kekreilamonyü uko mha kesuo chü kemochie zelieya mo; tsiu mia huo bie pesuoshü kemochie zhütsu zelieya mo.

¹⁷Ukoe kerügekerüzhü ca cü mu mha pekakecü zu krieyakezha la.

¹⁸Derei kemiathomia chae niakicha kemhie ziekruoi baya, teiso tseikecüu tsolietuoü zie miemie zhüya.

¹⁹Kerüzhümia chae teizei kemhie zeiboui zo; süla kicüpuo nunu u phi mesüwaya shikecü rei siya mo.

²⁰A nuo, a dieko rünyüliecie; n nyieto kedeipie a kepu dieko rünyüliecie.

²¹Süko bu n mhi therüta hie; süko pie n melou nu shü se balie;

²²Sükoe kerhei mu keshürho khapie die süko ca sikeliemia gei shüyakezha la.

²³N melou se mhakele nu menuolie; süu geinu kelhou metei paryakezha la.

²⁴N tie bu mha kesuo pu hie, mia se kedakecü die bu n kinu pecietalie.

²⁵N mhi bu mha meho pechie kemezhü toulie, tsiu n mhi bu n mhodzütsa meho toushülie.

²⁶N phi se tuoyakezha chau bu mezhülie, sitse n cha pete khrukhrelietuo.

²⁷Rürei n zatsa morei n vitsa vata hie; mha kesuo nunu n phi shükereiliecie.