Read Angami Naga Mhasidie 5 Bible Online

Mhasidie 5 - Angami Naga bible

Mhasidie 5

¹A nuo, a mhasidie rünyüliecie, n nyie kedeipie a mhasi caülako rünyüliecie;

²Sitse no khrukhre balietuo mu n tie mhakesikele pulietuo.

³Thethenupfü[5] tie-e mepfhidzü tuoi, mu puo me-e tier ki rei meju kuokecü la;

⁴Sishierei süpfü thelatsa we pfhü pie tsiena kepfhü tuoi, zhiecha lutsahatsa puoü hekecüpfü kemhie zo.

⁵Puo phi kesia kitsatie tsuya, puo phichakoe mekhru chau medzi vozhüya.

⁶Puoe kerhei cha nu leketuo puo khashüya mo, derei rüge lutsahatsa va tuoya, süla no süko silie kenjü.

⁷Süla nieko nhicuko, a pfhe rünyüliecie, sidi a dieko therhieta hiecie.

⁸N cha bu süpfü penuo vo hie, tuo puo kikha penuo vo hie;

⁹N therhu pie kekreimia tsüwa, mu u zho kesuomia bu n teicieko da pejüwa molieketuo la;

¹⁰Sikemomia bu n kinyiko se u kelhuo chü mu n mhathoko pie solhimia vie chüta molieketuo la;

¹¹N kelhou thelatsa n chü n mo thachü vorketa ki, no meheimelo batatuo,

¹²sidi sie, “kiüdi a kepetha die mecü mu a meloue kepetha die rütsete shi?

¹³A a kepethamia die rünyülie mote, mu a nyieto pie a kepethamia tsülie mote.

¹⁴Ae mechü kehou mhodzünu ka tseitaketuo tha nu vorta zo” itatuo.

¹⁵N thuo n liki dzü krielie, mu n dzükhou nu dzü krukezhüu krieliecie.

¹⁶N dzüluo bu chazou keza vokecü, rücü dzü bu chadiko nu kevo puotou me?

¹⁷Süko bu n vie rübei zolie, kekreimia ze keza hie.

¹⁸N dzüluo bu thejakepfüu chülie, mu n khriesa ki ze lhoukeliepfü ze n neiliecie.

¹⁹Puo bu chüzhiekrü u neitseikecüpfü mu chüzhiekrü u noumvüsieicüpfü tuoiliecie, puo merü bu puotei pete nu n kenei chülie, mu no puo kekhrieu bu n teshü se sei balie.

²⁰A nuo, kiüdi thenu kekreimia bu n bie kemeze ba ga? Mu kiüdi pieüpfü merü ciepie batuo ga?

²¹Kekreilamonyü themia cha pete Jihova mhi ki baya, mu puo n kevo cha pete meho baya.

²²Kelhiecümia u rüzhüko bu u mapfülietuo, mu u kephouma roko thuo u phalietuo.

²³Puoe dieze nu bakemo la siatuo, puo mhale mothorkecü la puo rütsi tuote.