Read Angami Naga Mhasidie 6 Bible Online

Mhasidie 6 - Angami Naga bible

Mhasidie 6

¹A nuo, noe n die pie n zanuou tsüshü, mu mia kekreimia[6] la n die phrashü ro,

²N dieko nunu pukeshü dieko thuo n malietuo mu no phrakeshü dieko thuo n telietuo;

³Süla a nuo, hau chü di n kelaliecie, noe n zanuou dzie nu baketa la, rükri vo di n thuo n chü kerünuolie, sidi n zanuou ki n mezhiemeloliecie.

⁴N mhi bu ze morei rünguta hiecie.

⁵Chüwhuomia dzie nunu nhachüu ta pralieyakezha tuoi, rawhuomia dzie nunu perae pruotayakezha tuoi, no n thuo n kelaliecie.

⁶No mhachükemecüu, vo nhieco rüliko mehocie, di mhasiliecie.

⁷Puoe puo kepfhemia se mo zorei, Puo kezhamia jü, morei puo kekhakecümia jü,

⁸Siürei teile ki puo kecüca keselieya, mu lieyie teiki puoca kengulieya.

⁹Harie kemecüu, no kichiepuo zezhü zotieya ga? No kedikechükipuo n keze nunu colietieya ga?

¹⁰keduo yopuo ze zalie, keduoyo puo rüngulie n dzie thepie keduoyo puo rüleilie si zo ba,

¹¹mha kejü kerügumia tuoi n gei vortuo, mu ketsakemere terhüthemia tuoi vortuo.

¹²Themia kesuo, kerüzhümia, kerüzhakecü die pu tuoya,

¹³Puoe mhiphrakete, puo phinie kele, puo dziekinuo pie mia tha tuoya;

¹⁴Kerüzhakecü melou se, mha kesuo rhü sei, kezekesuo prushüya;

¹⁵Süla kemezhieketuo puo gei mhai vortuo; puo bietshebietsha pie chü kemene lalie kenjütatuo.

¹⁶Mha sorou hako Jihovae ngumecüya, thenieu puo mhodzü ki kerütse zo.

¹⁷Kemiakokecü rhiu, kemeda meü, kejo kejümia zie pekrukecü dzie,

¹⁸u melou se mha kesuo kerhü, mha kesuo chütuoü ta mhai kevo phinie.

¹⁹Ketijü zhapukechü, mu siezedzürie donu kezekesuo prushüyakezhamia.

²⁰A nuo, n puo die khakeshüko khapie baliecie, mu n zuo n pethakeshüko khawa hiecie.

²¹Süko pie n melou nu ba zolie, süko pie n vo nu kelielie.

²²No tuo kevora, süko n cha thalietuo; no ze ketsu ki, süko n rüguolietuo; mu no co kesier ki, süko n ze kerüchütuo.

²³Kekreilamonyü diekhakeshükoe mitubou puo kemhie zo, mu kepetha zhokoe kezie zo; mu petha petsei keba dieko themia kelhouzho la;

²⁴thenu kesuo, mia seyakezhapfü tie nunu n kelalietuo.

²⁵N nou nu puo zivi menguta hie, morei puo bu puo mhirho üse n ketsiwa hie;

²⁶Kekreilamonyü niekhrüda yopuo se thethepfü puo zhakhrülie vi; derei süpfüe themia kerheiro puoma kereu pfhüzhüya.

²⁷Miapuonie puo merü nu mi wepie tuo di süu bu puo pfhenei thewa molie vi me?

²⁸Morei miapuonie puo phi thewa mo di thezhü ketu gei tuo volie vi me?

²⁹Sütuoi mia puoe vo puo zanuou kimiapfü ze zhü liro süu pejo motalie lho;

³⁰Kerügumia puoe khe merü tuota, di rügu cü puo valuo chükelie la zo we mia puo ngumecütaya mo;

³¹Siürei puo telieta ümha ro, puoe se thenie sutuo, puo kinu puonyapuora pete pie süu mesetuo.

³²Derei themia kehoupuorei thethenupfü ze pieü kechümia puo mhasimhale kejümiata zo; sikecü chükecümia puo thuo puo ruopfü pekawaya.

³³Puoe rüzapfülietuo mu thethapfütatuo; mu thenga krakelieu mhakipuorei rürhielie kenjü.

³⁴Mia nupfunuo puoe puo keropfü puo nou meyie siertuo, mu puo khepu lie kesie nhie puo mia khashülie lho zo.

³⁵Mha kekra pie sutuoü zorei, puoe süu lielie lho, morei süla puo nei chülie lho.