Read Angami Naga Mhasidie 7 Bible Online

Mhasidie 7 - Angami Naga bible

Mhasidie 7

¹A nuo, a dieko ze balie mu a diekhakeshüko se n kinyi chüliecie;

²a diekhakeshüko se balie; di lhouliecie, mu a kepethadieko üse n mhi shülou mhieliecie,

³süko pie n dziekinuoko gei phapfülie, süko pie n melou nu thuliecie.

⁴Mhasi üse, “No sü a üpfü zolie,” iliecie; mu mhacamhala kesi üse n kicükinumia üliecie;

⁵silie ro thethenu,[7] puo dieko üse mia setuoyakezhapfü dzie nunu n kelalietuo.

⁶A a kinu khirki keya nunu mha mehoshü,

⁷ru khriesarüüko donu mia puo puo kesikele kejü ae ngu,

⁸puoe hapfü keba kepenuo chau nu tuo vozhü, sidi hapfü ki kevo chau nu vota,

⁹niaki le varü, thevatie, teizeibouiketa ki.

¹⁰Tsiu harie, thenumiapfü puo thethenumia pfhenei, se di vor puo ze kese, mu puo do vi phi.

¹¹Hapfüe lhou rüyo, mu puo ki nu ba jülieya mo;

¹²süla puoe cha nu tuo, puo lhithochüko nu tuo, mu puoke peteko nu mia pfhe baya.

¹³Süpfü puo telie, mu puo meboshü, sidi thenga le mo zo di sie puo ki,

¹⁴“A ruosuo chü tuote, mu thie a phrakeshüko chüwate;

¹⁵sidi a n ze kesetuoü vorte, a hie chü n pfhütuo ru, n nguliete!

¹⁶A pfhe kezivipfü, puokhu kethu mhatho, Ijiptmia linenpfhe kememhiepfü pie a zhü khrapie zhü;

¹⁷A mharekethengu, aloepfü, mu seichü pie a zhü re chü kethengu piezhü.

¹⁸Vorlie khe, avu teiso vorlie kemochie kekhrie batuolie; avu kekhrie di a vu nei ba khe,

¹⁹kekreilamonyü a nupfu ba mote, puo rüve kepetse nu vote;

²⁰Puo raka likhuo puo se puo siemedzite; puo khrüluo nhie nu la kinu vortuo.”

²¹Süpfüe puo die vi phikecü la puo rüchülieta; puo se di puo kebvülieta.

²²Puoe süpfü sie medzi mhai vota, Puoe thudo te ze puo kedukhri nu kevo tuoi, morei tekhra prou kepre di kebie nu leketa tuoi,

²³Theütsie puo mecümelou vashü kemochie, perae kebie nu puo kerheiro pekawalie kevi si mo di pruo sünu thutsuyakecü tuoi vota.

²⁴Süla harie, a nuonuoko, tsie a pfhe rünyüliecie, sidi a tie nu dieko ze menuoliecie,

²⁵N nou pie süpfü kitsashü hie, tuo rütsi se süpfü chako nu vota hie;

²⁶kekreilamonyü puoe themia kekra bie kerüzawate; ketho zo, themia kemeteimia kekra süpfü bu u dukhriwata zo.

²⁷Süpfü ki-e Sheol nu kevo chau zo, kesia kibouko nu tsutazhü zo.