Read Angami Naga Mhasidie 8 Bible Online

Mhasidie 8 - Angami Naga bible

Mhasidie 8

¹Mhasi-e puo thuo shiekhouiya moü me? Tsiu kesikele-e puo pfhe chü ba moü me?

²Puoe thechü kerükrieko zügei baya, chadzako nu thaya;

³Puoe rüna nu kele ki kharuko nu, tsiu kikhako khie kevor ki shiekhoui di;

⁴“Harie themiako, a nie kieya, mu a pfhe ha themia nuonuoko la ho.

⁵Harie nieko mhale pesoukemoko, mhasi ca siliecie; harie kemeloko, nie melou bu tseiphreiliecie,

⁶Rünyüliecie, kekreilamonyü a mha kevitho dze puya; a tie tiehiekesie ki mha puotoukecüko puya;

⁷a tie-e ketho-u pu zotuocü la; mha kesuoe a tie nu kerütse zo.

⁸A me nu dieko pete kemiatho nunu zo, süla mhapuonurei kerüzhakecü morei miareikemo tuo mo.

⁹Puocapuola silieyakezhamia mhodzü ki we süko pete mecietsuoi zo, mu mhasi mhalelieyakezhamia mhodzüki we süko puotou zo.

¹⁰Rakachü mo di a kepethadie lieliecie, mu suna kevipfü mo di mhasimhale lieliecie;

¹¹kekreilamonyü mhasi-e cümenyie ki vikuo, mu nie-e mha mehoumenguyakecü pete rei pie puo ze kemejükeliepfü mo.

¹²Ae mhasiu, kemenuou ze lhou baya, sidi mhasi kesa dze pfhü se parlieya.

¹³Jihova khrükeprei-e mha kesuou rütsekelieu zo. Kemiakokecü, kemelhakecü, mha kesuo chau, mu die kesuo kepu a ngumecüya.

¹⁴Ae kepetha mu mhasi puotoukecü ba, ae puocapuola silieyakecü mu kekuo kebau.

¹⁵A geinu kedimiako di baya, kezhako bu thezho puotoukecü se parlieya,

¹⁶a geinu kedimia nuonuoko mu kezhamiako kijüu kekha se baya,

¹⁷A a khrieyakezhamia khrieya, mu thehie chü a pfhüketuomia a ngulietuo.

¹⁸Kinyi mu therhu a gei ba, balieketuo kinyi mu kruolieketuo rei sa.

¹⁹A si vükelieu we suna kevi kirei vikuo, mu a mhayiekoe rakachü kevipfü kirei vikuo.

²⁰Ae kemiatho cha nu voya mu ketho capiko nu tuoya.

²¹Süusü a khrieyakezhamia bu kinyi ngulieketuo, mu u kinyibouko ketshu chülietuo.

²²Jihovae sietse nu mhachükeshü mhodzü puo thuo puo chau nu a peviese tuote.

²³Kerieki, sietse nu, morei kijüu chüliekemo nu puoe a chüshüwata zo.

²⁴Thiedzü dzü kesou kejü tei ki, thiedzü dzüluo dzü kru par kemo nu a chüshüwate.

²⁵Kijüthou kerükrieko chülie kemo nu, kijükhruko rei chülie kemo nu a chüliete;

²⁶Puo kijü mu lieko chülie kemo nu, morei kijü nu nyophe puorei parlie kemo nu.

²⁷Puoe teiko chükeshü ki, a süki tuota zo, puoe dzü kesou whi vokeshü ki,

²⁸Puoe teigei kimhou chükeshü ki, puoe kesou nu dzüluoko chükeshü ki,

²⁹Puoe dzükezha bu puo die tseta motuoü die khakeshü ki, puoe kijüu bodeko dekeshü ki,

³⁰Süki a puo ze tuo, puo ze mhachüyakezhamia puo tuoi mu teisonhie ae puo keneiu, puo mhodzü ki a nei siei vor zo.

³¹Kijüu ze a nei vor mu a kenei themia nuonuoko gei tuo.

³²“Süla a nuonuoko, tsie a pfhe rünyüliecie; kekreilamonyü a zho zeyakezhamia thejapfülieya.

³³Kepethadie rünyülie di mhasiliecie, mu süu meliewa hie.

³⁴A pfhe rünyüyakezhamia, teisonhie a kharu nu pfhe balieyakezhamia, a kicieko vareipfü thayakezhamia theja ngulietuo.

³⁵Kekreilamonyü a ngukeliemia kerhei ngulieya, mu Jihova khriepfülietuo.

³⁶Derei a petsouyakezhamia puo thuo puo ruopfü pekawaya, a ngumecüyakezhamia pete kesia khrieya zo.”