Read Angami Naga Pethakeshüu 1 Bible Online

Pethakeshüu 1 - Angami Naga bible

Pethakeshüu 1

¹Jerusalem nu kediu, David nuo, Pethakeshüu[1] dieko.

²Kemethuo sie rei kemethuo zo, Pethakeshüe[2], sidi puya, kemethuo sie rei kemethuo zo! Mha pete rei kemethuo zo.

³Themiae niakiu khro nu kemezhie di mhachükelieko puo kemevi kedipuo ba ga?

⁴Phou puo votaya, tsiu phou kekrei puo la vorya, derei kijüu kechachie ba seiya.

⁵Niaki thu parya, tsiu niaki letaya, mu rükri di puo kesier thau nu la votaya.

⁶Teikhrie pekhrotsa rükhrie voya, sidi rükhrie rüwhi pesotsa votaya; teikhrie-e rüwhi sei baya zo, tsiu teikhrie-e puo chau medzi di rüwhi latataya.

⁷Rücü pete kru dzükezha nu tsuya; sirei dzükezhau tshulieya mo; rücükoe kru kirapuo votaya shiü, uko kru sünu vo seizhüya zo.

⁸Mha pete[3] nu unyiekecü thuo tshu; themiae süu pu hulie kenjü; u mhi mhangu puo kelhuo chülieya mo, morei unyie-e mhapfhe rünyü puo kelhuo chülieya mo.

⁹Mha kicüpuo ba shiü süu baketuou zo, chü vorketuou la zo, tsiu mha chükewau, chü la vorketuou la zo; tsiu niaki khro mha kesa puorei ba mo.

¹⁰“Mehoshücie, hauha mha kesawe” sikecü pulie kevi mha huo ba me? Süue thiedzütho u mhodzü tuote.

¹¹Keriekimiako rükra motaya; mu mha thiesie lhou vorketuoko rei rükralieketuo ba mo.

¹²A, Pethakeshüu[4], Jerusalem nu Israelmia kediu chü.

¹³A nou pie teikhro mhachüyakezhako mhasi se di kega meho tsiu pfhüse partuoü sie, Kepenuopfüe themia nuonuo bu se mereinu di khakeshü süu u nei kemo mhatho puo.

¹⁴Niaki khro nu chüyakezha mhatho pete a nguwate; tsiu harie, mha pete kemethuo zo, tsiu teikhrie whuoketuo mhie zo.[5]

¹⁵Mha mezhü moketau bie kemezhü lalie kenjü, tsiu mha bakemo-u phrülie kenjü.

¹⁶A a thuo a rüchü di sie, “Jerusalem nu a mhodzü kevor themia pete ki mhasi ngu kralie, mu a noue mhasi tsiu kesikele kekra methawate.”

¹⁷Tsiu a nou bu mhasilietuoü, mu mha kenya tsiu meciekemo silietuoü sie zo. Derei hauha rei teikhrie whuoketuo mhie zokecü a silie.

¹⁸Kekreilamonyü mhasi kekra kebara thenou kemezhiekecü rei kekra ba; tsiu mhasimhale ngu krakelieu nousuo rei ngu kraya.