Read Angami Naga Pethakeshüu 10 Bible Online

Pethakeshüu 10 - Angami Naga bible

Pethakeshüu 10

¹Teizie kesiae tier rekethengu chüpie puo bu menataya, sütuoi mhasikemo mhatho huoyoe mhasi tsiu therhu chü pejüwaya.

²Mhakesimia meloue puo dzie puo zatsa balieya; derei mhasikemomia meloue puo vitsa baya.

³Mhasikemo-u cha nu tuo kevo ki rei, puo kesikele tsa, sidi puoe mhasikemomia ücü mia pete bu silieya.

⁴Mhanuü kezhamia puoe n gei puo nei mota ro, n thau perieshü hie, jü bakelie geinu kekrükecü kekra bie kemenelieyacü la.

⁵Niakiu khro a mha kesuo puo ngu, süu sümia kekhayakezhamia puo geinu kekrükecü kevor tuoi.

⁶Mhasikemomia pie thechü kerükrie kekra nu shü, tsiu mhakenyimia thechü kerünuo nu keba.

⁷Ae miadiemia bu gura gei keba, tsiu kedinuoko bu miadiemia tuoi chatuoketuo ngu.

⁸Themia thekre thiekecümia te sünu tsutuo, tsiu kehoupuorei sozha biephapfü kepramia tinyhü puo medutuo.

⁹Kehoupuorei ketsie phrokecümia sü geinu rüzapfülieya, tsiu sei phrokecümia sügeinu kemichie ngulieya.

¹⁰Mhanuü thegiu puoü suota, mu puoü kerülie mo liro, puoe puo hie chükuo sashü morosuo, derei mhasi-e mia puo khruohipie puo bu vikehielieya.

¹¹Tinhyüe meshülie kemo nu mia meduya ro, tinyhü meshükezhamia kemevi jü.

¹²Mhakesimia tie nu diekoe ngukemezhie puya, derei mhasikemomia puo tie thuo puo mezulietuo.

¹³Puotie nu die mhale kemo die nu sedeya; tsiu puo die thelakoe mhachü kepesuo kenya die zo.

¹⁴Derei mhasikemomia die bu puo tshupfü tuoya. Kedipuo chü vortuo shi miapuorei si mo zorei, tsiu thiesie kedipuo chütuo shikecü supuonie puo ki pulie ta?

¹⁵Mhasikemomia mhathoe puo pelhowaya, süla ukoe nadi nu kevo chau rei siya mo.

¹⁶Ce kijüu, n kediu bu mia kituo[17] chü, mu n kedinuoko khise thehethehie chüya liro,

¹⁷Harie kijüu, n kediu kevimia puo chü, tsiu n kedinuoko puotei touki thehethehie chü süusü meteilieketuo la, tsiu meze la mo liro, noe ruokuo zo.

¹⁸Kemecü la kiu rükrete, tsiu menuo kemo la kiu pota.

¹⁹Thehethehie kechüe kenyü la zo; tsiu zu u chüpie kedzülelieya, rakae mha pete mezashüya.

²⁰N kele nu zorei kediu rüse hie, morei n zhübou nu zorei kenyimia rüse hie, kekreilamonyü teikhrie nu perae n pfhe toupfü voshülie vi; morei puoshü kenyi khunuo huo süu dze pushü rei si momu.